Հայաստանի խոշորագույն հանքարդյունաբերական ձեռնարկությունը հրապարակել է իր Կայուն զարգացման առաջին զեկույցը

Արմինֆո.Նոյեմբերի 22-ին Հայաստանի պոլիտեխնիկական համալսարանում տեղի է ունեցել Զանգեզուրի պղնձամոլիբդենային կոմբինատի 70 ամյակին նվիրված կոնֆերանս, որի ընթացքում ներկայացվել է ԶՊՄԿ  Կայուն զարգացման առաջին զեկույցը:

Հայաստանի հանքարդյունաբերական ոլորտի կայուն զարգացման առաջնահերթությունները, ինչպես նաև ընդերքօգտագործման համաշխարհային մարտահրավերներն ու միտումները վեր հանելու նպատակ ունեցող միջոցառումը կազմակերպել էր Հայաստանի հանքագործների և մետալուրգների միությունը, Զանգեզուրի կոմբինատը, Հայաստանի ազգային պոլիտեխնիկական համալսարանը և Տնտեսական լրագրողների ակումբը:

Միջոցառմանը մասնակցում էին ՀՀ ՏԿԵ նախարար Գնել Սանոսյանը, ոլորտը համակարգող այլ պաշտոնյաներ ԶՊՄԿ և այլ ընկերությունների ղեկավարներ, Պոլիտեխնիկակական համալսարանի պրոֆեսորադասախոսական կազմի ներկայացուցիչներ, մասնագետներ։

«Ողջունելի է այն հանգամանքը, որ կոմբինատի ղեկավարությունը ընդառաջում է համայնքի զարգացմանն ուղղված ցանկացած նախաձեռնությանը, եւ, որ համայնք-կոմբինատ հարաբերությունները կառուցողական են եւ արդյունավետ։ Անվիճելի է կոմբինատի դերը երկրում աշխատատեղերի ստեղծման գործում։ Հազարավոր քաղաքացիների զբաղվածությունը մարզում եւ հանրապետությունում ապահովվում է ընկերության գործունեության շնորհիվ»,- իր խոսքում ասել է նախարար Գնել Սանոսյանը՝ կարեւորելով ոլորտում կայուն զարգացման, բնապահպանական, սոցիալական պատասխանատվության հարցերի շուրջ քննարկումը եւ շնորհավորեց ԶՊՄԿ-ին՝ ընկերության 70 ամյակի եւ կայուն զարգացման զեկույցի հրապարակման առիթով։  

«ԶՊՄԿ-ն այս տարվա առաջին 9 ամիսների տվյալներով, պետական բյուջեի համար ապահովել է 130 մլրդ դրամի հարկ։ Համեմատության համար նշենք, որ սա ավելին է, քան խոշոր հարկատուների ցանկի հաջորդ 6 ձեռնարկություններից ստացված հարկերը միասին վերցրված։ Տնտեսական ազդեցությունն անհերքելի է։ Միաժամանակ, կարեւոր եմ համարում ընդգծել, որ  լավ կառավարումը, կայուն և կառուցողական արդյունաբերական հարաբերությունների պահպանումը, բնապահպանական և սոցիալական հարցերին լուրջ վերաբերմունքը այժմ հիմնական խնդիրներն են, որոնք պետք է լուծեն պատասխանատու ընկերությունները: Ուստի, ԶՊՄԿ-ն իր գործունեության մեջ ամենալուրջ ուշադրությունն է դարձնում և միշտ կդարձնի վերոնշյալ ասպեկտներին», - իր ելույթում ասել է ԶՊՄԿ գլխավոր տնօրեն, Գեպրոմայնինգ ընկերությունների խմբի նախագահ Ռոման Խուդոլին։

Նշվել է, որ այս զեկույցը պատրաստվել է դեռևս կոմբինատի նախորդ ղեկավարության օրոք, բայց ԶՊՄԿ նոր ղեկավարությունը որոշել է այն հրապարակել՝ ընդունելով որպես ելման կետ։ Այսուհետ յուրաքանչյուր տարի ընկերությունը կներկայացնի կայուն զարգացման հաշվետվությունը։

«Հանքարդյունաբերություն, կայուն զարգացում և մոդեռնիզացիա» և «ՀՀ հանքարդյունաբերության ներդրումային հնարավորությունները» թեմաներով կայացել է երկու  պանելային քննարկում` տարբեր շահագրգիռ կողմերի, ոլորտի մասնագետների մասնակցությամբ, որոնք վերլուծել են ՀՀ տնտեսության համար նշանակալի դեր ունեցող ոլորտի բոլոր խնդիրները` հատկապես,  բնապահպանական, սոցիալական և տնտեսական անվտանգության առումներով:

Հիշեցնենք, որ Գեպրոմայնինգ ընկերությունների խումբը՝ Հայաստանի խոշորագույն արդյունաբերական ներդրողներից մեկը, երկրում աշխատում է 15 տարի ։ Խմբի հայկական ակտիվները բաղկացած են Սոթքի ոսկու հանքից, Արարատի ոսկու կորզման ֆաբրիկայից և Ագարակի պղնձամոլիբդենային կոմբինատից: 15 տարվա աշխատանքի ընթացքում խումբն իր հայկական ձեռնարկությունների արդիականացման համար ներդրել է ավելի քան 400 մլն ԱՄՆ դոլար ։ Խմբի սոցիալական ներդրումների չափը ներկայության շրջանների զարգացման գործում գերազանցում է 10 մլն ԱՄՆ դոլարը։

2021 թվականի սեպտեմբերին ԳՊՄ խմբի կողմից կառավարվող "Արդյունաբերական ընկերություն"-ը ձեռք է բերել Հայաստանի լեռնահանքային արդյունաբերության առաջատար Զանգեզուրի պղնձամոլիբդենային կոմբինատի (Zangezur Copper Molybdenum Combine CJSC) բաժնետոմսերի 60% - ը՝ Հայաստանի կառավարությանը փոխանցելով իր բաժնեմասի 25%-անոց փաթեթը, որի կառավարումը 2022 թվականի հունվարին փոխանցվել է Հայաստանի պետական հետաքրքրությունների ֆոնդին (ԱՆԻՖ)՝ պահպանելով պետական սեփականության իրավունքը: