Արմինֆո.Ս.թ. դեկտեմբերի 2-ին տեղի է ունենալու «Էյչ-Էս-Բի-Սի Բանկ Հայաստան»-ի և «Ջինիշյան» հիշատակի հիմնադրամի «Ջերմոցային տնտեսությամբ զբաղվող ֆերմերների հմտությունների բարելավում արդյունավետ և նորարարական ջերմոցային կառավարման նպատակով» համատեղ ծրագրի բացման արարողությունը։ Ծրագրի ընդհանուր բյուջեն կազմել է 19,780 ԱՄՆ դոլար, որից 14,300 ԱՄՆ դոլարը նվիրաբերել է «Էյչ-Էս-Բի-Սի Բանկ Հայաստան»-ը: Սույն ծրագրի իրականացման նպատակով «Ջինիշյան» հիշատակի հիմնադրամը տրամադրելու է նաև մինչև 100 միլիոն ՀՀ դրամի չափով վարկային ֆոնդ։
Ծրագրի նպատակն է հնարավորություն տալ ջերմոցային տնտեսությամբ զբաղվող մարզային ֆերմերներին բարելավելու իրենց ջերմոցների արդյունավետությունն ու շահութաբերությունը՝ տրամադրելով նրանց գիտելիքներ ու հմտություններ նոր մեթոդների և առաջադեմ տեխնոլոգիաների վերաբերյալ, ինչպես նաև տրամադրել ֆինանսավորում պետական սուբսիդավորման հետ մեկտեղ՝ անհրաժեշտ ներդրումներ ներգրավելու համար:
Ծրագիրն ուղղված է ՀՀ մարզերում բնակվող բոլոր այն ֆերմերներին, ովքեր ցանկանում են հիմնել փոքր ջերմատնային տնտեսութուն, կամ արդեն իսկ ունեն ջերմատուն՝ մինչև 1000 քմ տարածքով։
Ծրագիրն իրականացվելու է մի քանի փուլով: Առաջնային փուլում դիմորդների մեծամասնությունը՝ առնվազն 80 ֆերմեր, հնարավորություն է ունենալու մասնակցել առցանց դասընթացների, որի ընթացքում ծանոթանալու է նորարար գյուղատնտեսության մեթոդներին, փոքր ջերմատների ուժեղ և թույլ կողմերին և գյուղատնտեսության այս ենթաոլորտի հիմնարար խնդիրներին և հնարավորություններին, ինչպես նաև կիրառվող առաջադեմ տեխնոլոգիաներին և մեթոդներին։ Նշված դասընթացից հետո մասնակիցներն անցնելու են ընտրության փուլ և լավագույները շարունակելու են աշխատել փոքր խմբերով, ինչպես նաև ստանալու են անհատական խորհրդատվություն ոլորտի առաջատար մասնագետների կողմից։
Ներդրումների պատրաստ ֆերմերները անցնելու են հատուկ ջերմատնային տնտեսությունների բիզնես մոդելավորման դասընթացներ։ Լավագույն բիզնես մոդելները ներկայացվելու են ֆինանսավորման՝ լիզինգի միջոցով՝ պետական սուբսիդավորման ծրագրի շրջանակներում վճարվող տոկոսադրույքը մինչև 10 տոկոսի չափով նվազեցնելու հնարավորությամբ։
Ծրագրի ավարտից հետո «Ջինիշյան» հիշատակի հիմնադրամը շարունակելու է մասնագիտական աջակցություն ցուցաբերել ֆինանսավորում ստացած ֆերմերներին առաջիկա մի քանի տարիների ընթացքում՝ ներգրավելով ոլորտի փորձառու և նեղ մասնագետներին՝ նպաստելով մարզերում կայուն գյուղատնտեսության զարգացմանը։