Ամերիաբանկը դեկտեմբերի 1-ին ձեռնամուխ կլինի 10 մլն դոլար ծավալի դոլարային պարտատոմսերի հերթական տրանշի նախնական տեղաբաշխմանը

Արմինֆո. Ամերիաբանկը դեկտեմբերի 1-ին կսկսի 10 մլն դոլար թողարկման ծավալով դոլարային անվանական, արժեկտրոնային և ոչ փաստաթղթային պարտատոմսերի հերթական տրանշի նախնական տեղաբաշխումը:

Այդ մասին նշված է ՀՀ Կենտրոնական բանկի կայքում զետեղված թողարկման ազդագրում, ըստ որի, նախատեսվում է թողարկման տեղաբաշխումն ավարտել 2023թ. փետրվարի 10-ին: Այդ Տրանշի շրջանակներում կթողարկվի 100 հազար պարտատոմս  100 դոլար անվանական արժեքով։ Կտրոնի եկամտաբերությունը սահմանվում է 3,75%: Արժեկտրոնային վճարումների հաճախականությունը նախատեսված է եռամսյակը մեկ: Այս տրանշի ամբողջական մարումը նախատեսված է 2024 թվականի դեկտեմբերի 1-ին։

Այս դոլարային տրանշի պարտատոմսերը ձեռք բերել ցանկացողները կարող են դրամական միջոցները փոխանցել Ամերիաբանկում բացված համապատասխան հաշվեհամարին. 1570043100494501:

Այս տրանշի թողարկման մասին որոշումը կայացվել է Ամերիաբանկի տնօրենների խորհրդի կողմից 2022թ. փետրվարի 22-ին, իսկ բանկի տնօրինության որոշումը կայացվել է 2022թ. նոյեմբերի 24-ին:

Նշենք, որ 2022 թվականին Ամերիաբանկը դոլարային պարտատոմսերի նախորդ տրանշերը թողարկել է փետրվարի 14-ին, հուլիսի 14-ին և սեպտեմբերի 7-ին, համապատասխանաբար 8 մլն դոլար, 5 մլն դոլար և 10 մլն դոլար ծավալով, որոնց արժեկտրոնային եկամտաբերությունը սահմանվել է, համապատասխանաբար, 3,5% և 3,75%: Այդ թողարկումների պարտատոմսերն արդեն ցուցակված են Հայաստանի ֆոնդային բորսայում։ Այդ թողարկումների ամբողջական մարումը տեղի կունենա 2024թ-ին (մայիսի 14-ին) և 2025թ-ին (հուլիսի 14-ին և սեպտեմբերի 7-ին): Ըստ ԱրմԻնֆո-ից պատրաստած Հայաստանի բանկերի ֆինանսական վարկանիշի, 30.09.2022 թ. դրությամբ Ամերիաբանկը զբաղեցնում է 2-րդ հորիզոնականը կորպորատիվ պարտատոմսերի տեղաբաշխումից ներգրավված միջոցների ծավալով՝ 93.1 մլրդ դրամ կամ 229.6 մլն դոլար: 2019-2022թթ.բանկն այդ ցուցանիշն ավելացրել է գրեթե երկու անգամ: Բանկային հատվածի այս ցուցանիշի հանրագումարային ծավալում Ամերիաբանկին բաժին է ընկել մոտ 26%:

Ամերիաբանկը բավականին ակտիվ է Հայաստանի կորպորատիվ պարտատոմսերի շուկայում՝ 2016թ. մարտից սկսած թողարկելով իր արժեթղթերը և նույն թվականին նախաձեռնելով առաջին թողարկումը միջազգային շուկայում ՝ հունիսին, իր ներդրումային կառավարչի ՝ ՀԳ ներդրումային ընկերության միջոցով, հաջողությամբ տեղաբաշխել է 20 մլն դոլար ծավալով պարտքային արժեթղթեր Լյուքսեմբուրգի 4 ներդրումային ֆոնդերում:

Ամերիաբանկը բազմիցս ճանաչվել է "Արժեթղթերի միջազգային շուկայում պահառուական հաշվի լավագույն օպերատոր", ինչպես նաև հաղթել է "Կորպորատիվ արժեթղթերի շուկայում շրջանառվող պարտատոմսերի լավագույն հաշվետու թողարկող", "Բորսայի լավագույն անդամ կորպորատիվ արժեթղթերի շուկայում", "Պետական պարտատոմսերի լավագույն շուկա ստեղծող" անվանակարգերում:

Հիշեցնենք, որ Ամերիաբանկը, որը հայկական շուկայում գործում է 1996թ. հոկտեմբերի 31-ից, ունիվերսալ բանկ է, որը տրամադրում է ներդրումային, կորպորատիվ և մանրածախ բանկային ծառայություններ՝ բանկային լուծումների համալիր փաթեթի տեսքով: Ամերիաբանկը առաջատար ֆինանսատեխնոլոգիական կազմակերպություն է, որը ներկայանում է նորարարական և թվային միջավայրով ' ֆինանսական և ոչ ֆինանսական ծառայությունները միավորող էկոհամակարգով: Ամերիաբանկն առաջնորդվում է բիզնեսի կառավարման հաճախորդամետ և պատասխանատու քաղաքականությամբ՝ մատուցելով բարձրորակ ծառայություններ թվային, ժամանակակից և անվտանգ միջավայրում: 2022թ. հոկտեմբերի 1-ի դրությամբ Բանկի բաժնետերերն են Imast Group (CY) Limited-ը (նախկինում ՝ Ամերիա Գրուպ (Սի - Ուայ) Լիմիթեդ) ՝ 48,9%, ՎԶԵԲ-ը՝ 17,73%, Ասիական զարգացման բանկը՝ 13,92%, ESPS Holding Limited-ը՝ 11,97%, և Afeyan Foundation for Armenia Inc.-ը՝ 7,48%: