ԱԿԲԱ Բանկը սկսել է 5 մլն դոլար եւ 3 մլրդ դրամ ծավալով հերթական դոլարային եւ դրամային պարտատոմսերի առաջնային տեղաբաշխումը

Արմինֆո. ԱԿԲԱ Բանկը սկսել է 5 մլն դոլար եւ 3 մլրդ դրամ ծավալով հերթական դոլարային եւ դրամային պարտատոմսերի առաջնային տեղաբաշխումը: Ինչպես նշվում է բանկի հաղորդագրության մեջ, այդ թողարկումների առաջնային տեղաբաշխումը մեկնարկել է մարտի 1-ին, իսկ ավարտը նախատեսված է մինչեւ մայիսի 31-ը ներառյալ:

Դրամային տրանշի (AMACBAB2AER7) շրջանակներում թողարկվել է 30 հազար պարտատոմս ' յուրաքանչյուրը 100 հազար դրամ անվանական արժեքով, տարեկան 11,5% արժեկտրոնային եկամտաբերությամբ: Իսկ դոլարային տրանշի շրջանակներում (AMACBAB2BER5) թողարկվել է 50 հազար պարտատոմս՝ յուրաքանչյուրը 100 դոլար անվանական արժեքով, տարեկան 5 տոկոս արժեկտրոնի եկամտաբերությամբ։ Դրամային եւ դոլարային պարտատոմսերի շրջանառության ժամկետը սահմանվել է 36 ամիս: Երկու տրանշերի շրջանակներում կտրոնների վճարումը նախատեսված է վեց ամիսը մեկ անգամ ։ Վերոնշյալ երկու թողարկումների պարտատոմսերի ամբողջական մարումը տեղի կունենա 2026թ.մարտի 1-ին:

Վերոնշյալ թողարկումների պարտատոմսերը ձեռք բերել ցանկացողները պետք է լրացնեն հայտը և ներկայացնեն ԱԿԲԱ Բանկ: Դրամային և դոլարային պարտատոմսերի գնման համար, համապատասխանաբար, ֆիզիկական և իրավաբանական անձանց հայտերի նմուշները զետեղված են Բանկի կայքում' համապատասխան հղումներով.

https://www.acba.am/uploaded/dramayin-hayt-fizikakan-andz.pdf ,

https://www.acba.am/uploaded/dolarayin-hayt-fizikakan-andz.pdf ,

https://www.acba.am/uploaded/dramayin-hayt-irav-andz.pdf ,

https://www.acba.am/uploaded/dolarayin-hayt-irav-andz.pdf .

Ըստ թողարկման ազդագրի՝ այդ տրանշերի թողարկման և տեղաբաշխման մասին որոշումը ԱԿԲԱ բանկ-ի խորհուրդը կայացրել է 2022 թվականի օգոստոսի 19-ին, իսկ Բանկի վարչության որոշումը հետեւել է 2022 թվականի նոյեմբերի 1-ին։

Նշենք, որ Հայաստանի ֆոնդային բորսայի և Կենտրոնական դեպոզիտարիայի կողմից ֆոնդային շուկայի մասնակիցների միջեւ ամեն տարի անցկացվող մրցույթին, որի արդյունքներն ամփոփվել են 2022 թվականի օգոստոսին, "ԱԿԲԱ Բանկ"ԲԲԸ, ելնելով 2021 թվականի ընթացքում ցուցաբերած ակտիվությունից և նախաձեռնողականությունից, հաղթող է ճանաչվել "Հատուկ մրցանակ" նոր անվանակարգում՝ աչքի ընկնելով կապիտալի շուկայում ակտիվ ինտեգրմամբ  եւ նորարարական մեթոդների  կիրառմամբ։

ԱրմԻնֆո-ի պատրաստած Հայաստանի բանկերի ֆինանսական վարկանիշի 2023թ. հունվարի 1-ի տվյալների համաձայն, ԱԿԲԱ Բանկը հաշվետու տարվա ընթացքում սեփական պարտատոմսերի տեղաբաշխումից ներգրավել է 5.4 մլրդ դրամի ($13.7 մլն) միջոցներ: Տարեկան կտրվածքով ԱԿԲԱ Բանկն ապահովել է այդ ցուցանիշի 56% աճ։

Հիշեցնենք, որ ԱԿԲԱ Բանկը հիմնադրվել է 1996 թվականին եւ ներկայումս հանդիսանում է Հայաստանի խոշորագույն բանկերից մեկը: Բանկն առաջատար հնգյակում է հիմնական հաշվեկշռային ցուցանիշներով. Ակտիվներ, վարկային ներդրումներ (ինչպես կորպորատիվ, այնպես էլ մանրածախ), պարտավորություններ (ինչպես ժամկետային ավանդների գծով, այնպես էլ ցպահանջ պարտավորություններ), ընդհանուր կապիտալ, զուտ շահույթ: ԱԿԲԱ Բանկը ագրոհատվածի վարկավորման գծով անփոփոխ առաջատարն է, շուկայի ընդհանուր ծավալում մինչեւ 50,3 տոկոս մասնաբաժնով: Մասնաճյուղային ցանցի ընդգրկմամբ նույնպես Բանկն առաջատարն է. ունի 63 ստորաբաժանում, որոնցից 44-ը գտնվում են հանրապետության մարզերում, 19-ը ՝ Երևանում: 2021 թվականին բանկն իրականացրել է բաժնետոմսերի խոշոր թողարկում, որի արդյունքում ՓԲԸ-ի կարգավիճակը փոխել է ԲԲԸ-ի և առաջատար է դարձել բաժնետերերի թվով. 31.12.2022 թ. դրությամբ "ԱԿԲԱ Բանկ" ԲԲԸ-ն ունի 6376 բաժնետեր: Այդ բաժնետերերի մասնաբաժինը բանկի կապիտալում ներկայացված է հետևյալ կերպ. "ԱԿԲԱ Ֆեդերացիա" ՓԲԸ' 83,84%, SJSC "Sacam International"՝ (Credit Agricole բանկային խմբի անդամ)' 4,55%, իսկ մնացած 11,65%-ը պատկանում է իրավաբանական և ֆիզիկական անձանց, այդ թվում' ԱԿԲԱ ֆեդերացիայի, ԱԿԲԱ լիզինգի և ԱԿԲԱ Բանկի աշխատակիցների