Հինգշաբթի, 16 Մարտի 2023 13:08

Արմինֆո. «Ճանապարհային դեպարտամենտ» հիմնադրամի գործադիր տնօրեն Գոռ Ավետիսյանը և հիմնադրամի ներկայացուցիչները հանդիպում են ունեցել Հյուսիս-Հարավ ճանապարհային միջանցքի ներդրումային ծրագրի Տրանշ-2-ի՝ Աշտարակ-Թալին ճանապարհի վերակառուցման տեխնիկական հսկողության և ինժեների գործառույթներն իրականացնող «Էջիս Ինթերնեյշնլ» և «Կոքս Կոնսալթ» համատեղ ձեռնարկության ծրագրի ղեկավար Ռիչարդ Թադանիի հետ։

 

Ինչպես նշված է «Ճանապարհային դեպարտամենտ» հիմնադրամի հաղորդագրությունում, Տրանշ-2-ի՝ Ագարակի հնագիտական վայրը շրջանցող 8կմ նոր ճանապարհի կառուցման նպատակով պայմանագիր է կնքվել մրցույթում հաղթող ճանաչված կապալառուի հետ, որն շինհրապարակի կազմակերպման և նախաշինարարական աշխատանքներ է իրականացնում։

 

Ճանապարհային դեպարտամենտի գործադիր տնօրեն Գոռ Ավետիսյանը, ողջունելով Ռիչարդ Թադանիին, նշել է, որ Տրանշ-2 ծրագրի շրջանակներում հերթական արդյունավետ համագործակցությունն է ակնկալում «Էջիս Ինթերնեյշնլ» և «Կոքս Կոնսալթ» ՀՁ-ի հետ՝ հայտնելով, որ այդ գործակցությունը կոչված է կարևորագույն նշանակություն ունեցող ենթակառուցվածքի շինարարությանը: «Անձամբ ես և Ճանապարհային դեպարտամենտի թիմը պատրաստակամություն ենք հայտնում համագործակցաբար աշխատելու, բոլոր հարցերը միասին լուծելու, որպեսզի նախանշված աշխատանքները կատարվեն ժամանակին և որակով»,- նշել է պարոն Ավետիսյանը։ Նա նաև շեշտել է Հյուսիս-հարավ ճանապարհի կարևոր նշանակությունը Հայաստանի համար։

 

Ռիչարդ Թադանիի հետ հանդիպման ընթացքում անդրադարձ է եղել մինչ այժմ շինարարի և ինժեների հետ տարված աշխատանքներին, քննարկվել են մի շարք հարցեր, որոնք առնչվում էին ինժեների թիմին, աշխատանքային ծրագրին, նշված հատվածում հողերի օտարմանը և այլն։ Ճանապարհային դեպարտամենտի ներկայացուցիչներն ընդգծել են, որ շինարարությունը հնարավորինս շուտ պետք է մեկնարկի, և՜ շինարարը, և՜ ինժեները պետք է խստագույնս հետևեն աշխատանքների ժամանակացույցին՝ կատարելով պայմանագրային պարտավորությունները։

 

Հիշեցնենք, որ 34 կմ երկարությամբ Տրանշ 2 - ի հատվածի (Աշտարակ-Թալին) վերակառուցումն իրականացվում է Ասիական զարգացման բանկի և ՀՀ կառավարության համաֆինանսավորմամբ։

Նախորդ տարեվերջին ՀՀ փոխվարչապետ Մհեր Գրիգորյանը հաղորդել էր, որ ԱԶԲ-ն երկու տրանշով Հայաստանին կտրամադրի 14.4 մլրդ դրամի վարկ "Հյուսիս-Հարավ" ճանապարհի կառուցման համար:

 

Նշենք, որ տարածքային կառավարման և ենթակառուցվածքների նախարար Գնել Սանոսյանը հաղորդել էր, որ ներկայումս "Հյուսիս-Հարավ" տրանսպորտային միջանցքի շրջանակներում շահագործման է պատրաստ Միայն Արտաշատ - Երևան-Աշտարակ հատվածը: Նրա խոսքով ՝ հինգ տրանշերից աշխատանքները կատարվել են միայն մեկով։ Մնացած չորս տրանշերի շինարարությունը գտնվում է իրականացման տարբեր փուլերում։ Նշենք, որ "Հյուսիս-Հարավ" նախագիծը թույլ կտա իրանական սահմանից մինչև վրացական սահման հեռավորությունը 556 կմ-ից կրճատել մինչև 490 կմ: Ճանապարհը զգալիորեն կհեշտացնի դեպի Սև ծով ելքը ոչ միայն Հայաստանի, այլև Իրանի համար ։ Նախագիծը ելք կապահովի դեպի Սև ծով և դեպի եվրոպական երկրներ՝ Հայաստանի (Մեղրի - Կապան - Գորիս-Երևան - Աշտարակ - Գյումրի - Բավրա) և Վրաստանի տարածքով։ Միջանցքի շինարարությունն ի սկզբանե նախատեսվում էր ավարտել 2019 թվականին։ Ծրագրի արժեքը մշտապես վերանայվել է դեպի բարձրացում։ Մինչդեռ, 2012թ. սեպտեմբերին, երբ սկսվեց ավտոմայրուղու շինարարությունը, գումարը, որը նշում էին Հայաստանի կառավարության ներկայացուցիչները, մի քանի անգամ պակաս էր՝ 962 մլն դոլար: