Արմինֆո. Չնայած այն հանգամանքին, որ շատերը կասկածում էին 2023 թվականի պետբյուջեի եկամտային հոդվածի կատարումն ապահովելու Հայաստանի ունակությանը, կարելի է արձանագրել, որ ս.թ. առաջին եռամսյակի արդյունքներով պետական գանձարանի հարկային եկամուտներն աճել են 60,8 մլրդ դրամով։ Այդ մասին ապրիլի 6-ին կառավարության հերթական նիստում հայտարարել է վարչապետ Նիկոլ Փաշինյանը։
Այսպես, 2023 թվականի հունվար-մարտ ամիսներին հարկային եկամուտների և պետական տուրքերի ծավալը հասել է 461,4 մլրդ դրամի, ինչը 15,2%-ով գերազանցում է նախորդ տարվա նույն ժամանակահատվածի ցուցանիշը։ 2023 թվականի առաջին եռամսյակի ծրագրային ցուցանիշը գերազանցվել է 14,4 մլրդ դրամով կամ 3,2%-ով։
Հաշվետու ժամանակահատվածում հարկատուներին և ֆիզիկական անձանց վերադարձվել է շուրջ 93.5 մլրդ դրամ, ինչը 42.2 մլրդ դրամով կամ 82.2%-ով ավելի է նախորդ տարվա նույն ժամանակահատվածի ցուցանիշից:
Եկամտահարկի վերադարձը, 2022 թվականի համանման ցուցանիշի համեմատ, աճել է 4,4 մլրդ դրամով կամ 49% - ով՝ հասնելով 13,4 մլրդ դրամի։
Առաջին երեք ամիսներին 2,4 տրլն դրամի հաշիվ-ապրանքագրեր են գրվել, ինչը 591 մլրդ դրամով կամ 31%-ով ավելի է 2022թ. նույն ժամանակահատվածի համեմատ։ Այդ թվում՝ տպվել են 564 մլրդ դրամի ՀԴՄ կտրոններ՝ 48,7 մլրդ դրամով կամ 9,4 տոկոսով ավելի։
