Երեթշաբթի, 6 Հունիսի 2023 20:19

Արմինֆո. Ավելի վաղ Հայաստանի էկոնոմիկայի նախարարի հայտարարած Երասխի մետալուրգիական նոր գործարանն զբաղվելու է սեւ մետաղների, ամրանների, պողպատե անկյունակների եւ խողովակների արտադրությամբ: Այդ մասին ԱրմԻնֆո-ին հաղորդել են ՀՀ էկոնոմիկայի նախարարության մամուլի ծառայությունից:

 

Տրամադրված տեղեկատվության համաձայն,  մետաղագործական արտադրությունը գործարկվելու է հայ-ամերիկյան GTB STEEL ՍՊԸ ձեռնարկության կողմից, որը ստեղծվել է Հայաստանում՝ անցած տարի:

Ձեռնարկությունն արդեն անցել է ՇՄԱԳ (շրջակա միջավայրի վրա ազդեցության գնահատում) բոլոր ընթացակարգերը և կհամալրվի ժամանակակից արտադրական հզորություններով:

 

Ինչպես ավելի վաղ իր ֆեյսբուքյան էջում հաղորդել էր էկոնոմիկայի նախարար Վահան Քերոբյանը, Երասխում կառուցվում է 70 մլն ԱՄՆ դոլար ներդրմամբ խոշոր հայ-ամերիկյան մետալուրգիական գործարան։ Արտադրամասը 30մ բարձրությամբ ու 16,500 քմ մակերեսով շենք է, որտեղ տարեկան թողարկվելու է 180,000 տոննա արտադրանք։ «Արդեն աշխատում են 200 մարդ, գործարկելուց հետո կաշխատի 1000», - գրել էր նախարարը։

 

Նշենք, որ Հայաստանի իրավաբանական անձանց պետական ռեեստրի տվյալներով՝ GTB STEEL-ը հիմնադրվել է 2022 թվականի ամռանը։ Ձեռնարկության սեփականատերերն են ԱՄՆ քաղաքացի Բոբի Քանգը և ՀՀ քաղաքացի Նոնո Սարգսյանը: Ձեռնարկության տնօրենն է Տիգրան Հակոբյանը: