Արմինֆո.Երևանում բացվել է ավանդական 18-րդ Դիջիթեք 2023 տեխնոլոգիական ցուցահանդեսը, որը "Մերիդիան" ցուցահանդեսային կենտրոնում մեկ հարկի տակ հավաքել է 120 ընկերություն, որոնցից շուրջ 60-ը ներկայացված են ստարտափներով: Բացի այդ, ինչպես ավելի վաղ հայտարարվել էր, ցուցահանդեսին մասնակցում են միջազգային ընկերությունների շուրջ 10 ներկայացուցչություններ, որոնք Ռուսաստանից տեղափոխվել են Հայաստան:
Ալեքսանդր Եսայանը՝ Առաջատար տեխնոլոգիաների ձեռնարկությունների միության (UATE)
Union of Advanced Technology Enterprises) նախագահը, որը միջոցառման անմիջական կազմակերպիչն է, բացման արարողության ժամանակ ընդգծել է, որ DigiTec2023 - ը Հայաստանի ամենախոշոր և ամենահին տեխնոլոգիական միջոցառումն է, որի շրջանակներում հնարավորություն է ընձեռվում հանրությանը, գործընկերներին և, ընդհանուր առմամբ, համաշխարհային շուկային ցուցադրել Հայաստանի տեխնոլոգիական համակարգի նորարարական լուծումները:
Հաշվի առնելով անցած տարվա իրադարձությունները՝ ցուցահանդեսը 2022 թվականին չի կայացել և տեղափոխվել է 2023 թվականի սկիզբ, այսպիսով, ընթացիկ տարում միջոցառումը տեղի է ունենում երկու անգամ։ Նա նշել է, որ այս կարճ ժամանակահատվածում արդեն կարելի է տեսնել ոլորտի աճի բարձր դինամիկա՝ ինչպես նորաստեղծ ընկերությունների թվի, այնպես էլ ներկայացված լուծումների առումով, ինչը խոսում է ճյուղի բարձր ներուժի մասին:
UATE-ի գործադիր տնօրեն Սարգիս Կարապետյանն, իր հերթին, նշել է, որ "Տեխնոլոգիաներն ամենուր են" խորագրի ներքո անցկացվող ցուցահանդեսում ներկայացված են տարբեր ոլորտներում գործունեություն ծավալող ընկերություններ՝ սկսած բժշկությունից, ժամանակակից արվեստից, վերջացրած տիեզերական հետազոտություններով և այլն, որոնք իրենց աշխատանքում կիրառում են նորարարական լուծումներ:
Նա ընդգծել է, որ Միության նպատակն է միավորել Հայաստանի տեխնոլոգիական համայնաքը և խթանել նրանց անդամների միջև փոխգործակցությունը, նպաստել պետական համակարգերի թվայնացմանը որոշակի գործընթացների արդյունավետության բարձրացման համար և հայկական տեխնոլոգիաները ամրագրել միջազգային շուկայի քարտեզի վրա:
Այս տարի ցուցահանդեսի կազմակերպիչները նախաձեռնել են ներդրողների, վենչուրային հիմնադրամների ներկայացուցիչների հանդիպումներ սկսնակ ընկերությունների հետ, որոնք պետք է հասցնեն ներկայացնել իրենց ներուժը և հետաքրքրել ներդրողներին հետագա փոխգործակցության համար: Սպասվում են նաև բաց խոսափողներ, քննարկումներ, կոնֆերանսներ և այլն։ Ամեն տարի միջոցառմանը մասնակցում է շուրջ 80 հազար այցելու։
Նշենք, որ ցուցահանդեսին ներկայացված է նաև առանձին Artsakh Career Expo, որը կնպաստի ադրբեջանական ագրեսիայի հետևանքով իրենց հայրենիքից՝ Արցախից բռնի տեղահանված մեր հայրենակիցների զբաղվածությանը:
Միջոցառման տեխնոլոգիական հովանավորն է Team Telecom Armenia-ն։
Նշենք, որ ըստ ՀՀ վիճակագրական կոմիտեի տվյալների՝ 2023 թվականի առաջին կիսամյակում Հայաստանի արտաքին հաղորդակցային տեխնոլոգիաների ոլորտի հասույթն աճել է 89,1%-ով ՝ կազմելով 400.7 մլն դրամ։ Այդ գումարի առյուծի բաժինը (73%) պատկանում է ՏՀՏ ոլորտի ծառայություններին, 26% - ը՝ առեւտրին, իսկ ավանդաբար նվազագույն տոկոսը (0,2%)՝ արտադրությանը։
