Արմինֆո. Ուկրաինայի առևտրաարդյունաբերական պալատի նախագահ Գենադի Չիժիկովը Հայաստանի դեսպան Վլադիմիր Կարապետյանի հետ հանդիպման ժամանակ անդրադարձել է գործարար երկկողմ շփումների ակտիվացմանը:
«Մենք ունենք բարդ և խոստումնալից հարաբերություններ: Ուկրաինայում Հայաստանի Հանրապետության արտակարգ և լիազոր դեսպան Վլադիմիր Կարապետյանի հետ այսօր խոսել ենք երկկողմ գործարար շփումների ակտիվացման մասին։ Այս տարի երկու երկրներն էլ դրսևորեցին դրական տնտեսական դինամիկա. եթե Ուկրաինան տարվա արդյունքներով ցույց է տալիս ՀՆԱ-ի 5 տոկոս աճ, ապա Հայաստանը՝ գրեթե 10 տոկոս։
Բիզնեսը ձգտում է զարգացմանը և բաց է համագործակցության համար: Մենք տեսնում ենք ամենաբարձր մակարդակով Կիևի և Երևանի միջև շփումների ակտիվացումը, և սա կարևոր նշան է, որը բիզնեսին ոգեշնչում է միասին աշխատել։
Վլադիմիր Կարապետյանն ընդգծեց, որ համագործակցության պահանջարկ կա, սակայն Հայաստանում կա Ուկրաինայի ներկայիս տնտեսական իրավիճակի և հնարավորությունների մասին տեղեկատվության պակաս, մասնավորապես՝ որպես ԵՄ անդամակցության թեկնածու երկրի մասին։
Մենք պայմանավորվեցինք պարոն դեսպանի հետ համատեղ միջոցառում անցկացնել ուկրաինական և հայկական ընկերությունների համար՝ առաջին հերթին հայ ձեռներեցներին Ուկրաինայում աշխատանքային պայմանների մասին իրազեկելու նպատակով։ Նաև շնորհակալություն հայտնեցի մեր երկրի զարգացման գործում Ուկրաինայի հայ համայնքի կարևոր ներդրման համար: Միասին գնում ենք առաջ», - հայտարարել է Գենադի Չիժիկովը։
