Հայաստանում 0,8 տոկոս չորսամսյա գնաճը հրահրել են սննդամթերքն ու ծառայությունները

Արմինֆո.Հայաստանում 4-ամսյա 0,8 տոկոս գնաճ են հրահրել սննդամթերքն ու ծառայությունները, որոնք թանկացել են, համապատասխանաբար, 1,8 և 0,9 տոկոսով, մինչդեռ, ոչ պարենային ապրանքներն էժանացել են 1,6 տոկոսով: Սա շատ չի տարբերվում նախորդ տարվա պատկերից, երբ 2023թ. հունվար-ապրիլին 0,9% գնաճը պայմանավորված էր սննդամթերքի 1,6% գնաճով և ծառայությունների 1,1% թանկացմամբ՝ ոչ պարենային ապրանքների 1% էժանացման դեպքում։ Այդ մասին են վկայում ՀՀ վիճակագրական կոմիտեի տվյալները։

2024թ. հունվար-ապրիլին 2023թ. հունվար-ապրիլի համեմատ սպառողական շուկայում գնանկումը կազմել է 1.1% (նախորդ տարվա 6.2% գնաճի դիմաց)՝ ձևավորվելով սննդամթերքի 4.5% էժանացման արդյունքում, ոչ պարենային ապրանքների 0.2% թանկացման և ծառայությունների սակագների 2.9% աճի պայմաններում, մինչդեռ, մեկ տարի առաջ սննդամթերքը թանկացել էր (6.5%), իսկ ոչ պարենային ապրանքներն ու ծառայություններն թանկացել էին ավելի նկատելիորեն (համապատասխանաբար՝ 4.7% և 6,5%), քան հիմա: