Վիվա-ն վերջնականապես հրաժեշտ է տվել ՄՏՍ-ին. ընկերությունը հայտարարել է ռեբրենդինգի մասին

Արմինֆո. Հայաստանի տեխնոլոգիական առաջատար հանդիսացող «Վիվա Արմենիա» ՓԲ ընկերությունը ներկայացնում է իր նոր ապրանքային նշանը: Ինչպես պարզաբանել են ընկերության մամուլի ծառայությունում, «Վիվա Արմենիա» ՓԲ ընկերությունն այսուհետև Վիվա-ՄՏՍ-ի փոխարեն շուկայում կներկայանա Viva ապրանքային նշանի ներքո:

«Viva-ն նշանավորում է թվային ծառայությունների որակապես նոր մակարդակը, ընկերության նոր դիրքավորումը շուկայում ու զարգացման նոր ռազմավարությունը: Viva-ն իր մեջ կրում է ընկերության նորացված ինքնությունը՝ խորհրդանշելով շուկայում զբաղեցրած նոր դիրքերն ու հնարավորությունները, ժամանակակից նոր ծառայությունները, հաճախորդների ու մյուս շահառուների նոր ընկալումները ծառայությունների, որակի և ընկերության արժեհամակարգի վերաբերյալ:  Նոր ապրանքային նշանն ընկերության նոր ուղերձն է՝ ի պատասխան իր բաժանորդների նոր ակնկալիքներին», - ասվում է հաղորդագրությունում:

Հիշեցնենք, որ 2024թ. մարտի 25-ից Վիվա-ՄՏՍ-ի ֆիրմային անվանումը փոխվել է: Ավելի վաղ՝ ս.թ. հունվարին ՄՏՍ-ը հայտարարել էր Հայաստանի Հանրապետությունում իր դուստր ընկերության՝ "ՄՏՍ Հայաստան" ՓԲԸ-ի  բաժնետոմսերի 100%-ը Կիպրոսի «Ֆեդիլքո Գրուպ Լիմիթիդ»-ին վաճառելու գործարքի փակման մասին: Գործարքի պարագծի մեջ է մտել նաև "ՄոբիԴրամ" ՓԲԸ-ն, որը Հայաստանի շուկայում ֆինանսական ծառայություններ մատուցող վճարային համակարգ է, "ՄՏՍ Հայաստան"-ի 100% դուստր ընկերություն:

Մինչ գործարքը "ՄՏՍ Հայաստանը" պատկանում էր Aramayo Investments Limited-ին, որն, իր հերթին, լյուքսեմբուրգյան Allegretto Holding-ի միջոցով 100 տոկոսով ՄՏՍ-ի սեփականությունն էր: ԶԼՄ-ների տվյալներով, «Ֆեդիլքո Գրուպ Լիմիթիդ»-ի շահառուներն են Չժե Ջանգը եւ Կոնստանտին Սոկոլովը: Aramayo Investments Limited-ից կիպրական «Ֆեդիլքո Գրուպ Լիմիթիդ»-ին <ՄՏՍ Հայաստանի> 100% բաժնետոմսերի վաճառքին հայկական կարգավորիչը հավանություն էր տվել 2023 թվականի նոյեմբերին։ «Ֆեդիլքո Գրուպ Լիմիթիդ» -ի նմանատիպ հայտը հանձնաժողովի կողմից մերժվել էր 2023 թվականի ապրիլին, քանի որ այն "սպառնում էր Հայաստանի Հանրապետության ազգային անվտանգությանը կամ պետական շահերին":

ՀՀ կառավարության փետրվարի 29-ի նիստում գործադիրի որոշմամբ, որպես նվիրատվություն էր ընդունվել Հայաստանի Հանրապետությանը «Ֆեդիլքո Գրուպ Լիմիթիդ» ընկերությունից ընկերությանը սեփականության իրավունքով պատկանող «ՄՏՍ Հայաստան» փակ բաժնետիրական ընկերության 100 (հարյուր) տոկոս 1000 (հազար) դրամ անվանական արժեքով հասարակ բաժնետոմսերի (թվով 550.000 հատ) 20 (քսան) տոկոսին համարժեք՝ 110.000 հատ ընդհանուր թվով բաժնետոմսերը, և դրանց կառավարման լիազորությունը վերապահվել է Հայաստանի Հանրապետության վարչապետի աշխատակազմին:

Ընկերության տվյալներով ՝ այն սպասարկում է շուրջ 2,3 մլն բաժանորդի: