Արմինֆո.ՀՀ էկոնոմիկայի նախարար Գևորգ Պապոյանը Եկատերինբուրգում մասնակցել է ԵԱՏՄ արդյունաբերական քաղաքականության խորհրդի 6-րդ նիստին:
Նիստի ընթացքում մասնակիցները քննարկել են մինչև 2030 թվականը ԵԱՏՄ շրջանակում արդյունաբերական ոլորտում համագործակցության հիմնական ուղղությունները: Մասնավորապես, նրանք քննարկել են ռոբոտատեխնիկայի զարգացման, արդյունաբերական ռոբոտների արտադրության և ներդրման միջպետական ծրագրի մշակման հնարավորությունները, ինչպես նաև ԵԱՏՄ արդյունաբերական ճյուղերում համատեղ կոոպերատիվ նախագծերի իրականացման ժամանակ ցուցաբերվող ֆինանսական աջակցության հետ կապված հարցեր:
Գևորգ Պապոյանը նիստի ընթացքում նշել է, որ կարևոր է մշակել այնպիսի ընդհանուր մեխանիզմներ, որոնք ուղղված կլինեն արդյունաբերության ոլորտին աջակցությանը, նորարարությունների խթանմանը, տեխնոլոգիական արդիականացմանը և արտադրանքի մրցունակության բարձրացմանը:
Նշենք, որ արդյունաբերական քաղաքականության խորհրդի նիստում, որը կայացել է ԻՆՆՈՊՐՈՄ միջազգային համաժողովի շրջանակներում, հավանության է արժանացել նաեւ մինչեւ 2030 թվականն ընկած ժամանակահատվածում ԱՊՀ մասնակից պետությունների տրանսպորտային միջոցների համար բնական գազի ՝ որպես շարժիչային վառելիքի օգտագործման զարգացմանն ու խթանմանն ուղղված միջոցառումների համալիրի նախագիծը: Ներկայացվել են նաև թեթև արդյունաբերության ոլորտում ԱՊՀ մասնակից պետությունների համագործակցության զարգացման հայեցակարգի և դրա իրականացման միջոցառումների ծրագրի նախագծերը, ինչպես նաև հավանության է արժանացել ծանր մեքենաշինության ոլորտում համագործակցության մասին համաձայնագրի նախագիծը
