Արմինֆո. Փոխվարչապետ Տիգրան Խաչատրյանը մասնակցել է Շինարարի օրվա առթիվ կազմակերպված միջոցառմանը: Նա շնորհավորել է շինարարներին մասնագիտական տոնի կապակցությամբ՝ մաղթելով արգասաբեր աշխատանք:
«Կառավարությունն իր գործունեության ընթացիկ ծրագրով ստանձնել է պարտավորություն՝ իրագործելու աննախադեպ ծավալի քաղաքաշինական ծրագրեր հանրապետության ողջ տարածքում՝ կառուցելով մի քանի հարյուր դպրոց և նախադպրոցական հաստատություններ, առողջապահական, մարզական, մշակութային օբյեկտներ, հազարավոր կիլոմետրերով ճանապարհներ, իրականացնելով ենթակառուցվածքային բարդ և մեծածավալ այլ ծրագրեր:
Այս խոշորամասշտաբ նախագծերն իրականացնելու համար կպահանջվեն բազմապատիկ մեծ շինարարական կարողություններ։ Կառավարության ծրագրի՝ ժամանակին և որակով իրագործումը մեծապես կախված է նաև շինարարական կազմակերպությունների կարողություններից, որակյալ և սրտացավ աշխատանքից, զարգացման ուղղությամբ ներդրումներից, և, իհարկե, պետություն-մասնավոր գործակցության արդյունավետությունից»,-իր ելույթում նշել է Տիգրան Խաչատրյանը:
Կառավարության հաղորդագրության համաձայն, փոխվարչապետը խոսել է նաև որակի և տեխնոլոգիական նորարարությունների կարևորության մասին. «Մենք ակնկալում ենք, որ շինարարական կազմակերպությունները կշարունակեն ավելացնել իրենց կարողությունները՝ մեր հավակնոտ ծրագրերը ժամանակին իրագործելու նպատակով: Կարևորն այն է, որ շինարարությունը լինի տնտեսության շարժիչ ուժը ոչ միայն իր ծավալներով, այլև տեխնոլոգիական առաջընթացով, որակով, նորարարական մոտեցումներով, շինարարական աշխատանքների կազմակերպման մշակույթով: Այս համատեքստում ցանկանում եմ շնորհակալություն հայտնել բոլոր այն շինարարներին, ովքեր բարեխղճորեն իրագործում են պետական ծրագրերը՝ կիսելով այն գիտակցումը, որ կառուցում ենք մեր և մեր սերունդների որակյալ ապագայի համար։ Ձեր այսօրվա աշխատանքի լավագույն գնահատականը տալու են այն երեխաները, ովքեր վաղը սովորելու են նոր կառուցված հարմարավետ դպրոցներում և նախակրթարաններում, այն բուժառուները, որ սպասարկվելու են ժամանակակից պայմաններով հագեցած բժշկական հաստատություններում, այն մարդիկ, ովքեր լավ կառուցված ճանապարհներով կարողանալու են արագորեն և անվտանգ երթևեկել»։
Շնորհավորական ելույթներով հանդես են եկել նաև Տարածքային կառավարման և ենթակառուցվածքների նախարար Գնել Սանոսյանը, Քաղաքաշինության կոմիտեի նախագահ Եղիազար Վարդանյանը և Հայաստանի շինարարների միության նախագահ Գագիկ Գալստյանը:
Ելույթներին հաջորդել է պարգևատրման արարողությունը:
