Արմինֆո. 2024 թվականի վերջին Հայաստանում մշակվող հողերի մակերեսը կավելանա ավելի քան 14 հազար հեկտարով ։ Այդ մասին օգոստոսի 13-ին կայացած մամուլի ասուլիսի ժամանակ հայտարարել է ՀՀ էկոնոմիկայի փոխնախարար Տաթեւիկ Սարգսյանը։
Նրա խոսքով՝ վերջին տարիներին ավելանում է մշակվող հողերի մակերեսը։ Փոխնախարարը կոնկրետ թվեր չի հնչեցրել, միայն նշելով, որ այսօր Հայաստանում մշակվում է ցանքատարածությունների ընդամենը 49,5 տոկոսը ։ "Այդ ուղղությամբ իրականացվում եւ պլանավորվում են պետական աջակցության ծրագրեր, որպեսզի չմշակվող տարածքները մշակվեն", - հավաստիացրել է փոխնախարարը:
Հիշեցնենք, որ ս.թ. ապրիլին "Անվտանգություն և տնտեսական զարգացում" թեմայով համաժողովի ժամանակ ՀՀ գյուղատնտեսության նախկին փոխնախարար Աշոտ Հարությունյանը մտահոգություն էր հայտնել հանրապետությունում օգտագործվող վարելահողերի տարածքների զգալի կրճատման վերաբերյալ: Հարությունյանը նշել էր, որ 2015 թվականին մշակվել է 351 հազար հեկտար վարելահող ՝ առկա 446 հազար հեկտարից ։ Սակայն այս պահին, ըստ նրա, Վիճակագրական կոմիտեն հաղորդում է ընդամենը 200 հազար հեկտար մշակվող հողերի մասին ։ Ընդ որում, Հարությունյանը հայտարարել էր, որ չի հավատում Վիճակագրական կոմիտեի հնչեցրած թվերին։
