Արմինֆո.Հայաստանի իշխանությունները ցանկանում են Ախթալայում նոր կամուրջ կառուցել՝ նախկին կամրջի փոխարեն, որը ավերվել է ս.թ. մայիսի 25-26-ին տեղի ունեցած հզոր ջրհեղեղի հետևանքով:
ՀՀ կառավարությունը սեպտեմբերի 5-ի նիստում հավանություն է տվել "Հարավկովկասյան երկաթուղի"ՓԲԸ հաշվեկշռից երկու մետաղական կոնստրուկցիաներ հանելու մասին որոշման նախագծին:
Ինչպես նշվում է որոշման նախագծի հիմնավորման մեջ, այդ կոնստրուկցիաները ՀԿԵ-ին ամրագրվել են կոնցեսիոն պայմանագրի շրջանակում: Երկու կոնստրուկցիաներն էլ գտնվում են Լոռու մարզի Ղալթախչի երկաթուղային կայարանի տարածքում և չեն օգտագործվում ընկերության կողմից: Մինչդեռ, դրանք անհրաժեշտ են Լոռու մարզում ջրհեղեղի հետևանքով ավերված Ախթալայի կամրջի փոխարեն նոր կամուրջ կառուցելու համար:
Նախագիծը, ինչպես ընդգծվում է հիմնավորման մեջ, չի նախատեսում երկաթուղային տրանսպորտի ոլորտում իրականացվող քաղաքականության փոփոխություն: Հիշեցնենք, որ մայիսի 26-ին Հայաստանի հյուսիսում տեղի է ունեցել ջրհեղեղ, որն առաջացել է առատ տեղումների, հորդառատ անձրևի և Դեբեդ ու Աղստև գետերի վարարման հետևանքով, ինչը հանգեցրել է ենթակառուցվածքների զգալի ավերածությունների և չորս մարդու մահվան: Հանրապետության ներքին գործերի նախարարության տրամադրած տեղեկատվության համաձայն, տարերքը վնասել է ճանապարհներ, կամուրջներ ու երկաթուղային գծեր: Աղետի հետևանքների վերացման նպատակով տարածքային կառավարման և ենթակառուցվածքների նախարար Գնել Սանոսյանի գլխավորությամբ ձևավորվել է օպերատիվ խումբ:
