Չորեքշաբթի, 25 Սեպտեմբերի 2024 12:12

Արմինֆո. Հայաստանի առաջատար տեխնոլոգիաների ձեռնարկությունների միությունը (ԱՏՁՄ) և Գիտական նորարարության և կրթության կենտրոնը (CSIE) փոխըմբռնման հուշագիր են (MoU) ստորագրել, համաձայն որի, 2024 թվականի Նորարարության և տեխնոլոգիաների համաշխարհային համաժողովի՝ WCIT2024/DigiTec-ի օրերին, կկազմակերպվի «Նորարարություններն ինքնավար համակարգերում» թեմայով աշխատաժողով։ Վերջինս համախմբելու է առաջատար փորձագետների, հետազոտողների և ոլորտի մասնագետների աշխարհի տարբեր երկրներից՝ համագործակցության և մտքերի փոխանակման հնարավորություն ստեղծելով։

 

ԱՏՁՄ գործադիր տնօրեն Սարգիս Կարապետյանը և Գիտական նորարարության և կրթության կենտրոնի տնօրեն Րաֆֆի Պաղճեանը ստորագրել են հուշագիրը և նշել համատեղ ջանքերի մասին, որոնք նպատակ ունեն ապահովելու ոլորտի միջազգային փորձագիտական համայնքի ներգրավվածությունը։

 

«Ուզում եմ շնորհակալություն հայտնել WCIT-ին այս բացառիկ հնարավորության համար։ 2021 թվականին, երբ հիմնադրում էինք Գիտական նորարարության և կրթության կենտրոնը, մեր նպատակն էր Հայաստանը դարձնել ինքնավար համակարգերի առաջատար կենտրոն։ Այսօր, WCIT-ի աջակցությամբ, նախաձեռնել ենք «Նորարարություններն ինքնավար համակարգերում» թեմայով աշխատաժողովը, որի շրջանակներում Հայաստանում կհյուրընկալենք ոլորտի առաջատար գիտնականների և մասնագետների աշխարհի տարբեր երկրներից։ Նրանք կգան Հայաստան ոչ միայն աշխատաժողովին մասնակցելու, այլև հայաստանյան ՏՏ ոլորտը ուսումնասիրելու և նոր կապեր հաստատելու համար», - ասել է Գիտական նորարարության և կրթության կենտրոնի տնօրեն Րաֆֆի Պաղճեանը։

 

WCIT-ի մամուլի ծառայության հաղորդագրության համաձայն,  «Նորարարություններն ինքնավար համակարգերում» թեմայով աշխատաժողովը, որը տեղի կունենա հոկտեմբերի 6-ին Երևանի Կարեն Դեմիրճյանի անվան մարզահամերգային համալիրում, կանդրադառնա ստորջրյա, օդային և ցամաքային ռոբոտատեխնիկայի նորամուծություններին, դրանց կիրառման ոլորտներին և ապագա հեռանկարներին։

Մասնակիցները միջազգային փորձագետների հետ կքննարկեն ռոբոտների ինքնավարության մակարդակի բարձրացման տեխնոլոգիական լուծումները, մարտահրավերները, այդ համակարգերի ինտեգրումը տարբեր արդյունաբերական ոլորտներում:

 

Աշխատաժողովը հնարավորություն կտա ոչ միայն ոլորտի ներկայիս լուծումներն ուսումնասիրել, այլև ապագա տեխնոլոգիական զարգացումների համար նորարար մոտեցումներ մշակել։ Աշխատաժողովի խոսնակներից են Նաիրա Հովակիմյանը, ԱՄՆ Իլինոյսի համալսարանի Մեխանիկական գիտությունների և ճարտարագիտության ֆակուլտետի պրոֆեսոր, Գրեգորի Չիրիկջյանը, ԱՄՆ Դելավերի համալսարանի Մեխանիկական ինժեներիայի ամբիոնի ղեկավար, Էրիկ Ֆերոնը, Սաուդյան Արաբիայի Աբդուլլահ թագավորի անվան գիտության և տեխնոլոգիայի համալսարանի (KAUST) պրոֆեսոր, և այլ նշանավոր մասնագետներ։ Աշխատաժողովի և գրանցման վերաբերյալ մանրամասներին հնարավոր է ծանոթանալ CSIE-ի կայքէջում՝ https://csiefoundation.am/en/wcit2024/digitec

 

«WCIT2024/DigiTec-ի օրերին մենք պարբերաբար կխոսենք գիտության մասին և նպատակ ունենք ոլորտի լավագույն գիտնականներին հրավիրել Հայաստան։ Մենք հավատում ենք, որ համաշխարհային մարտահրավերների լուծումը տրվելու է գիտության միջոցով։ Ինչպես պատմությունն է ցույց տալիս, բոլոր համաշխարհային պատերազմներն ու արհավիրքները կանգ են առել գիտական նորամուծությունների շնորհիվ։ Շատ ուրախ ենք այս համագործակցության համար և շնորհակալ ենք Գիտական նորարարության և կրթության կենտրոնին այս նախաձեռնության համար»,-ասել է Առաջատար տեխնոլոգիաների ձեռնարկությունների միության (ԱՏՁՄ) գործադիր տնօրեն Սարգիս Կարապետյանը։

 

WCIT2024/DigiTec-ը տեղի կունենա 2024 թվականի հոկտեմբերի 4-7-ին Երևանի Կարեն Դեմիրճյանի անվան մարզահամերգային համալիրում՝ «ՄՏՔԻ ՈՒԺԸ. Արհեստական բանականություն՝ սահմաններից այն կողմ՝ էթիկայի շրջանակներում» խորագրով: WCIT2024/DigiTec-ը, անցկացման չորս օրերին, Հայաստանը կվերածի տեխնոլոգիական մտքի կենտրոնի՝ հանդիսանալով հարթակ ոլորտի և թեմայի շուրջ առաջատար համաշխարհային խոսնակների ելույթների, պանելային քննարկումների և B2B հանդիպումների համար:

 

Համաժողովի շրջանակներում կանցկացվի նաև WITSA World Cup ստարտափների մրցույթը շուրջ 20 երկրներից ընտրված ստարտափների շրջանում, կներկայացվեն նորարարական ցուցադրություններ, բիզնես ներկայացումներ, սեմինարներ և այլ միջոցառումներ: WCIT2024/DigiTec համաժողովը կդառնա գլոբալ հարթակ, որը նպատակ ունի` - ներկայացնելու հայաստանյան, և ոչ միայն, տեխնոլոգիական ներուժը ԴիջիԹեք էքսպոյի շրջանակներում, որը հանդիսանալու է հիմնական էքսպո հարթակը WCIT2024/DigiTec համար, - ուժեղացնելու տեղեկատվական տեխնոլոգիաների ազդեցությունը, իրազեկելու նորարարարությունների ու ԱԲ-ի վերջին և ապագա զարգացումների շուրջ, - Հայաստանը ներկայացնելու միջազգային հարթակներում և դիրքավորելու որպես նոր տեխնոլոգիական հաբ տարածաշրջանի համար, - խթանելու ներդրումները և ընդգծելու ՏՀՏ լուծումների կարևորությունը տարբեր տարածաշրջաններում և տնտեսություններում: Համաժողովի օրակարգը ընդգրկում է լայն աշխարհագրությամբ մասնակիցներ՝ ավելի քան 2,000 միջազգային պատվիրակներ կայցելեն Հայաստան միջոցառման օրերին:

 

Գիտական նորարարության և կրթության կենտրոն-ի մասին. Գիտական նորարարության և կրթության կենտրոնը ստեղծվել է 2021 թվականին` նպատակ ունենալով աջակցել գիտական նորարարությանը և կրթությանը Հայաստանում։ Գիտական նորարարության և կրթության կենտրոնում մենք միավորում ենք աշխարհի լավագույն համալսարանների տաղանդաշատ հայ գիտնականներին՝ հնարավորություն տալով նրանց մրցակցային միջավայրում արժեքավոր հետազոտություններ իրականացնել։ Կայքէջ։ https://csiefoundation.am/en Facebook: https://www.facebook.com/p/Center-for-Scientific-Innovation-and-Education-100091483967181/:

 

Նորարարությունների և տեխնոլոգիաների համաշխարհային համաժողովը (WCIT) հեղինակավոր համաշխարհային միջոցառում է, որը կազմակերպվել է ՏՏ և ծառայությունների համաշխարհային դաշինքի (WITSA) կողմից: WCIT-ը համախմբում է տեխնոլոգիայի առաջնորդներին, ոլորտի մասնագետներին, կառավարության ներկայացուցիչներին ամբողջ աշխարհից՝ ուսումնասիրելու և ձևավորելու տեխնոլոգիայի ապագան և դրա ազդեցությունը հասարակության վրա: Կայքէջ։ https://wcit2024-digitec.com Facebook: https://www.facebook.com/wcit2024.digitec

 

Առաջատար տեխնոլոգիաների ձեռնարկությունների միությունը համախմբում է ոլորտի ավելի քան 160 տեղական և միջազգային ընկերություններ։ ԱՏՁՄն նվիրված է արդյունաբերության աճին թիրախային նախագծերի միջոցով՝ հիմնադրել համապարփակ տեխնոլոգիական կրթություն Հայաստանում («Արմաթ» ինժեներական լաբորատորիաներ), դյուրացնել մուտքը համաշխարհային շուկա և փորձի փոխանակում կազմակերպված պատվիրակությունների միջոցով։ Բացի այդ, ԱՏՁՄ-ն զգալի ազդեցություն ունի նաև իրավական դաշտի վրա՝ քաղաքականության մշակման և կառավարության հետ համագործակցության միջոցով՝ խթանելով մրցակցային, բայց համագործակցային բիզնես միջավայրը։ ԱՏՁՄ-ն հայտնի է խոշոր միջոցառումների կազմակերպմամբ, որոնք ընդգծում են հայկական տեխնոլոգիական առաջընթացը։ Հատկանշական է WCIT 2019-ի հյուրընկալումը, գալիք WCIT 2024-ը և ամենամյա DigiTec Expo-ն, որն անցկացվում է արդեն մոտ 20 տարի՝ ցուցադրելով նորարարություններն ինչպես տեղական, այնպես էլ համաշխարհային լսարանին։ Այս ջանքերի շնորհիվ ԱՏՁՄ-ն շարունակում է բարձրացնել Հայաստանի ներկայությունը համաշխարհային տեխնոլոգիական միջավայրում։ Պաշտոնական կայքէջ՝ https://www.uate.org/

 

«ԴիջիԹեք Էքսպոն» տարածաշրջանի ամենալայնածավալ տեխնոլոգիական ամենամյա ամենալայնածավալ միջոցառում է, որտեղ ավելի քան 100 թիմեր ներկայացնում են իրենց արտադրանքը, ծառայություններն ու ընկերությունները՝ հազարավոր B2B, կառավարական և B2C այցելուներին։