Նույնիսկ եթե անդամ չդառնալ, բայց օգտագործել հնարավորությունները․Թունյանը՝ BRICS-ում Հայաստանի հեռանկարների մասին

Արմինֆո.«Հայաստանը կարող է ինտեգրվել ցանկացած միջազգային սխեմայի, որը համապատասխանում է իր շահերին։ Կոնկրետ BRICS-ի մասով չեմ կարող ասել, թե ինչ որոշում կկայացվի», - սեպտեմբերի 25-ին լրագրողների հետ զրույցում ասել է ԱԺ տնտեսական հարցերի մշտական հանձնաժողովի նախագահ, "Քաղաքացիական պայմանագիր" կուսակցության պատգամավոր Բաբկեն Թունյանը, պատասխանելով այն հարցին, թե որքանով է հնարավոր երկրի անդամակցությունը BRICS-ին։

Ամեն դեպքում, ըստ խորհրդարանականի, եթե անգամ ՀՀ-ն չլինի որևէ կառույցի անդամ, բայց, միևնույն ժամանակ, կարողանալ օգտագործել այդ կառույցի հնարավորությունները կամ մասնակցել այդ սխեմաներին կամ մեխանիզմներին՝ որևէ այլ կարգավիճակով, ապա դա կբխի երկրի շահերից:

"Աշխարհը գնում է սահմանները պարզեցնելու ճանապարհով: Այսինքն ՝ սահմանները չպետք է խոչընդոտ հանդիսանան միմյանց հետ նորմալ հարաբերություններ կառուցելու համար", - նշել է Բաբկեն Թունյանը։

Հիշեցնենք, որ BRICS-ի գագաթնաժողովը տեղի կունենա հոկտեմբերի 22-24-ը Կազանում: Սեպտեմբերի 18-ին Համաշխարհային հայկական գագաթնաժողովում ՀՀ վարչապետ Նիկոլ Փաշինյանը հայտարարել է, որ այս պահին BRICS-ին ինտեգրվելու օրակարգ չկա: Նա նշել է, որ ՌԴ նախագահից հրավեր է ստացել մասնակցելու հոկտեմբերին Կազանում կայանալիք BRICS-ի գագաթնաժողովին և ընդունել է այդ հրավերը: "Հիմա ավելին ասել չեմ կարող", - հավելել է Փաշինյանը։ Նա ընդգծել է, որ Հայաստանի ղեկավարությունն առաջին անգամ կմասնակցի BRICS-ի գագաթնաժողովին: <Ակնհայտ է, որ կլինեն տպավորություններ, որոնք ես կներկայացնեմ գործընկերներին՝ վերադառնալուն պես: Իսկ լրացուցիչ քայլեր կարվեն, եթե դրանց անհրաժեշտությունը լինի", - եզրափակել է վարչապետը ։