Ամերիաբանկը ԴիջիԹեք 2024-ի ֆինթեք գործընկերն է

Արմինֆո.Երևանում նախօրեին մեկնարկել է տարածաշրջանի խոշորագույն տեխնոլոգիական միջոցառումներից մեկը՝ ԴիջիԹեք 2024 ցուցահանդեսը, որի ֆինթեք գործընկերն է Ամերիաբանկը:

ԴիջիԹեք-ի շրջանակներում հոկտեմբերի 4-6-ը DigiInvest տաղավարում կտեղադրվի Ամերիաբանկի տաղավարը, որի հայեցակարգը կենտրոնացած է հաջողակ ներդրողի հմտությունների շուրջ: Իրենց ներուժը ստուգել ցանկացողները պետք է անցնեն Ամերիաբանկի թիմի կողմից պատրաստված 6 փորձությունների միջով, որոնցից յուրաքանչյուրը համապատասխանում է հաջողակ ներդրողի կոնկրետ հմտությանը. <հեռատեսություն>, <հավասարակշռվածություն>, <համբերատարություն>, <բանականություն>, <հաջողություն> և <համարձակություն>: Նա, ով հաջողությամբ անցնում է բոլոր փորձությունները, Ամերիաբանկում անվճար բացում է բրոքերային հաշիվ և որպես նվեր ստանում միջազգային ընկերության բաժնետոմսեր:

Բրոքերային հաշիվներն Ամերիաբանկի հաճախորդներին հնարավորություն են տալիս օգտվել MyInvest թվային հարթակից, որը MyAmeria հավելվածի մաս է կազմում: Ինչպես ԴիջիԹեք-ի շրջանակներում լրագրողների հետ զրույցում պարզաբանել է Ամերիաբանկի արժութային և բրոքերային գործառնությունների գծով տնօրեն Դիանա Հակոբյանը, MyInvest-ի միջոցով բանկի հաճախորդներին հասանելի են դառնում ավելի քան 30 շուկաներ, ավելի քան 25 հազար տարբեր գործիքներ, այդ թվում ՝ բաժնետոմսեր, պարտատոմսեր, ներդրումային ֆոնդեր և այլն: Այս հարթակում հնարավոր է և գնել բաժնետոմսեր, և կատարել առաջնային տեղաբաշխում՝ ընդամենը մի քանի կհպումով հաշված րոպեների ընթացքում:

Նա հիշեցրել է բանկի Հայաստանի էլեկտրական ցանցերի աննախադեպ ծավալով պարտատոմսերի տեղաբաշխման վերջին փորձը, նշելով, որ այդ պարտատոմսերի 20 տոկոսը տեղաբաշխվել է հենց MyInvest հարթակի միջոցով, ինչը խոսում է դրա բարձր պահանջարկի մասին:

Դիանա Հակոբյանի ասելով՝ նման հարթակները շատ կարևոր են կապիտալի շուկայի զարգացման համատեքստում: Քանի որ նախկինում մեր քաղաքացիների համար ներդրումներ կատարելը բավականին բարդ գործընթաց էր թվում, իսկ այժմ կարելի է առցանց ռեժիմով հաշիվ բացել մի քանի հպումով և անմիջապես ձեռք բերել նախընտրած գործիքը։

Բանկի արժութային և բրոքերային գործառնությունների գծով համատնօրենը նաև պատմել է, որ նախորդ տարի 3 անգամ աճել է Ամերիաբանկի հաճախորդ-բրոքերների թիվը, իսկ երրորդ եռամսյակի դրությամբ ՝ 2 անգամ: Հակոբյանը նշել է, որ մինչև տարեվերջ ակնկալվում է 3 անգամ աճ։ Իսկ ընդհանուր առմամբ, 2 տարվա ընթացքում, MyInvest-ի մեկնարկի պահից ի վեր, բրոքեր հաճախորդների թիվն աճել է, նրա հավաստմամբ՝ 10 անգամ: "Ընդհանուր առմամբ, ինչպես ներդրումների, այնպես էլ MyInvest պլատֆորմի նկատմամբ շուկայում մեծ հետաքրքրություն կա", - նշել է նա:

Իր հերթին՝ Ամերիաբանկի Բրոքերային ծառայության ղեկավար Արտուշ Ենգիբարյանը պատմել է, որ այս նախագիծը ստեղծվել է Ամերիաբանկի փորձառու և որակավորված թիմի կողմից, ինչը թույլ է տալիս կատարելագործել հարթակը, դրա ֆունկցիոնալը՝ հաճախորդների պահանջներին համապատասխան: Միևնույն ժամանակ, նա նշել է քաղաքացիների բարձր հետաքրքրությունը հարթակի նկատմամբ, հատկապես, երիտասարդ սերնդի շրջանում, որն ակտիվորեն օգտագործում է ժամանակակից տեխնոլոգիաները:

<Այսօրվա տեխնոլոգիաները հնարավորություն են տալիս ընդամենը մի քանի քայլ անցնելուց հետո դառնալ բազմամիլիարդանոց կապիտալ ունեցող խոշորագույն միջազգային ընկերության բաժնետեր: Միակ խոչընդոտը վախն է: Գլխաավորը՝ չվախենալ ձեր առաջին քայլերը կատարելուց, և դուք պետք է սկսեք ռիսկի ցածր մակարդակ ունեցող գործիքներից, որպեսզի հետագայում աստիճանաբար անցնեք ճիշտ ներդրումային ռազմավարության: Մեր թիմը կօգնի, որպեսզի առաջին քայլերը լինեն ճիշտ, իսկ ներդրումներն՝ ավելի արդյունավետ", - ասել է Ենգիբարյանը։

Նշենք, որ Ամերիաբանկի ներկայացուցիչ Դիանա Հակոբյանը մասնակցել է նաև "Թվային ներդրումների ապագան. նոր գործիքներ և հնարավորություններ Հայաստանի ֆինանսական շուկայում" թեմայով պանելային քննարկմանը:

Ներկայացնելով բանկի փորձն այս ոլորտում՝ նա պատմել է, որ դեռևս տարիներ առաջ Ամերիաբանկը բռնել է թվայնացման ուղին, իսկ միայն երկու տարի առաջ թվային փոխակերպումն անդրադարձել է նաև բանկի ներդրումային ծառայությունների վրա: Պանելային քննարկման ընթացքում Հակոբյանը խոսել է MyAmeria հավելվածում MyInvest հարթակի մշակման մասին, ներկայացրել դրա առանձնահատկությունները, առավելությունները, և անդրադարձել մշակողների թիմին: Այդ առնչությամբ նա նշել է, որ, հաշվի առնելով պրոֆեսիոնալ թիմի աշխատանքի ճկունությունը, որը փոփոխում է տվյալ նախագիծը օգտատերերի պահանջներին համապատասխան, հարթակը շատ հարմար է կիրառման համար եւ մեծ հետաքրքրություն է առաջացնում քաղաքացիների շրջանում: