WCIT2024-ը պաշտոնապես բացվեց. քննարկումների հիմնական թեման արհեստական բանականությունն է

Արմինֆո. Տեղեկատվական տեխնոլոգիաների համաշխարհային կոնգրեսը (WCIT 2024) պաշտոնապես բացվել է: Կարեն Դեմիրճյանի անվան մարզահամերգային համալիրը հոկտեմբերի 5-ին մեկ հարկի տակ էր հավաքել տեխնոլոգիական ոլորտի առաջատար մասնագետներին ՝ ինչպես միջազգային, այնպես էլ հայրենական, զրուցելու, մտքեր փոխանակելու և որոշելու արհեստական բանականության (ԱԲ) կիրառման ոլորտում հետագա քայլերը, քննարկելու դրա օգուտներն ու ռիսկերը: Այս տարի կոնգրեսն անցկացվում է «Մտքի ուժը. Արհեստական բանականությունը սահմաններից այն կողմ՝ էթիկայի շրջանակներում» խորագրի ներքո:

Բացման հանդիսավոր արարողությանը նախորդել է Հայաստանում WCIT2024-ի ղեկավար Հայկ Կարապետյանի, Կոնգրեսի համակազմակերպիչ Առաջատար տեխնոլոգիաների ձեռնարկությունների միության (UATE) նախագահ Հայկ Եսայանի , WITSA տեղեկատվական տեխնոլոգիաների և ծառայությունների համաշխարհային ալյանսի ղեկավար Շեն Սիի և Team Telecom Armenia հեռահաղորդակցային ընկերության գլխավոր տնօրեն Հայկ Եսայանի մամուլի ասուլիսը: Նշենք, որ վերջինս հանդես է եկել որպես WCIT/DigiTec2024 տեխնոլոգիական գործընկեր։

Ասուլիսի ընթացքում Հայկ Եսայանըմ հիշեցնելով, որ WCIT-ը Հայաստանում անցկացվում է երկրորդ անգամ, նշել է, որ շուտով մեր երկիրը պայծառ կետ կդառնա համաշխարհային ՏՏ հանրության համար:

Նա ընդգծել է, որ Team Telecom Armenia-ն, որպես հայրենական հեռահաղորդակցային ընկերություն, չէր կարող անմասն մնալ նման մասշտաբային և կարևոր իրադարձությունից և չէր կարող չաջակցել դրա անցկացմանը: Կոնգրեսը, ըստ Եսայանի, կօգնի բացահայտել մեր երկրի ներուժը, որն ավելի քան բավարար է, բայց որը մինչև վերջ չի իրացվել: "Կարծում եմ, որ Հայաստանում առկա ներուժը կարող է փոփոխություններ մտցնել միջազգային թրենդում", - ընդգծել է Team Telecom Armenia-ի ղեկավարը: Միջոցառումը, նրա խոսքով, թույլ կտա նաև հասկանալ, թե ինչ ուղղությամբ է շարժվում աշխարհը, այդպիսով, դա թույլ կտա սահմանել նաև հայկական ընկերությունների վեկտորը, հնարավորություններ ստեղծել դրանց զարգացման համար և ավելի մեծ ներուժ ներգրավել մեր երկիր:

Բացման հանդիսավոր արարողության ժամանակ ՀՀ բարձր տեխնոլոգիական արդյունաբերության նախարար Մխիթար Հայրապետյանը հայտարարել է, որ Հայաստանը ձգտում է դառնալ տարածաշրջանային կարևորագույն տեխնոլոգիական հանգույց, իսկ ապագայում նաև աշխարհին առաջարկել նոր բարդ տեխնոլոգիաներ և նորարարական լուծումներ: "Եվ այս միջոցառումը, այս հարթակը ևս մեկ անգամ ընդգծում է միջազգային տեխնոլոգիական կենտրոն դառնալու մեր հստակ կամքը", - ասել է նախարարը:

Նա ուշադրություն է հրավիրել այն հանգամանքի վրա, որ Հայաստանն արդեն վաղուց որոշում է կայացրել գնալ արհեստական բանականության շուրջ իր ռեսուրսները կենտրոնացնելու եւ նորարարական տեխնոլոգիաների զարգացման ճանապարհով: "Որովհետև լիովին վստահ է իր որոշմանը՝ դառնալու ստեղծված տեխնոլոգիաների սեփականատերը՝ ի շահ մեր միջավայրի, մոլորակի և մարդկության, և առաջարկում է միավորվել այս օրակարգի շուրջ, կառավարել մտքի ուժով ստեղծված տեխնոլոգիան", - նշել է նա:

ԱՏՁՄ նախագահ Ալեքսանդր Եսայանը ողջույնի խոսքում հիշեցրել է 2019 թվականին WCIT-ի հաջող ելքի մասին, որը նույնպես տեղի ունեցավ Հայաստանում: Նա ընդգծել է, որ կոնգրեսից հետո շատ ընկերություններ կարողացել են համագործակցության, ներդրումների համար հարթակներ ստեղծել։ Այդ կապակցությամբ Եսայանը հույս է հայտնել, որ ընթացիկ կոնգրեսը ևս հարթակ կդառնա մեր տեխնոլոգիական ոլորտի համար արդյունավետ համագործակցություն հաստատելու համար:

Միաժամանակ, անդրադառնալով ԱԲ-ին, նա նշել է, որ մեդալը երկու կողմ ունի: Առաջին հայացքից ԱԲ-ի կիրառումը դրական ազդեցություն կունենա տարբեր ոլորտների վրա, բայց, միևնույն ժամանակ, պետք է վստահ լինել, որ ԱԲ-ն իսկապես նպաստում է բարիքին և երաշխավորում մեր արժեքների պահպանումը: <Կոնգրեսի շրջանակում, մենք կքննարկենք մարդկության և տեխնոլոգիաների ապագան գալիք սերունդների համար և ԱԲ ապագան: Մեծ ուժ նշանակում է մեծ պատասխանատվություն>, - ասել է նա:

Նշենք, որ կոնգրեսն անցկացվում է Երևանում հոկտեմբերի 5-7-ը: Միջոցառման շրջանակներում տեղի կունենան անվանի բանախոսների ելույթներ, որոնց թվում են "Ինչպես դաստիարակել հաջողակ մարդ" միջազգային բեսթսելերի հեղինակ Էսթեր Վոյջիցկին, ABBYY ընկերությունների խմբի հիմնադիր Դավիթ Յանը, Picsart-ի համահիմնադիր Հովհաննես Ավոյանը, TELUS-ի տեխնիկական տնօրեն Իբրահիմ Գեդեոնը և այլոք:

Մասնակիցներին սպասվում են նաև պանելային քննարկումներ, Բ2Բ հանդիպումներ, բիզնես-նորարարական ցուցահանդեսներ, սեմինարներ և այլ միջոցառումներ: Կարևոր իրադարձություններից մեկը կլինի WITSA World Cup-ը (WWC): Ընդհանուր առմամբ, Հայաստան կայցելեն շուրջ 2 հազար պատվիրակներ աշխարհի ավելի քան 80 երկրներից:

Հիշեցնենք, որ WCIT 2024-ին զուգահեռ <Մերիդիան> ցուցահանդեսային կենտրոնում անցկացվում է ԴիջիԹեք էքսպո2024-ը, որտեղ ներկայացված է հայկական ՏՏ հատվածի ներուժը: