Փաշինյանն աշխատանքից ազատել է տարածքային կառավարման փոխնախարարին, ով պատասխանատու էր էներգետիկայի հատվածի համար

Արմինֆո.ՀՀ տարածքային կառավարման և ենթակառուցվածքների նախարարի տեղակալ Հակոբ Վարդանյանն ազատվել է զբաղեցրած պաշտոնից: Համապատասխան որոշումը հոկտեմբերի 11-ին ստորագրել է վարչապետ Նիկոլ Փաշինյանը:

Նախօրեին հայտնի դարձավ, որ հրաժարական է տվել ՀՀ Հանրային ծառայությունները կարգավորող հանձնաժողովի նախագահ Գարեգին Բաղրամյանը, ով առաջին անգամ գերատեսչության ղեկավար էր ընտրվել 2019 թվականի ապրիլին, իսկ 2024 թվականի փետրվարի վերջին վերընտրվել էր երկրորդ ժամկետով։ Ինչպես ԱրմԻնֆո-ի թղթակցին հայտնել են կարգավորիչի մամուլի ծառայությունում, հայտարարությունն արդեն ուղարկվել է խորհրդարան:

Հակոբ Վարդանյանը փոխնախարարի պաշտոնը զբաղեցնում էր 2018 թվականի հունիսից, իսկ ավելի վաղ ղեկավար պաշտոններ է զբաղեցրել "Հայաստանի էլեկտրական ցանցեր", "Տաշիր Գրուպ" և "Բարձրավոլտ էլեկտրական ցանցեր" ընկերություններում:

Բաղրամյանի և Վարդանյանի հրաժարականների պատճառները չեն նշվում։ Սակայն, ԶԼՄ-ներում շրջանառվում են լուրեր այն մասին, որ հրաժարականի մասին որոշումները պայմանավորված են օրերս Ազգային ժողովում տեղի ունեցած էլեկտրամատակարարման խնդիրների վերաբերյալ լսումներով, որոնք սուր քննադատություն են առաջացրել ոլորտի պատասխանատուների հասցեին: