Հայաստանն ու Ղրղզստանը քննարկել են տրանսպորտի բնագավառում փոխգործակցության զարգացման հնարավորությունները՝ շեշտը դնելով փոխադարձ ապրանքաշրջանառության ծավալների ավելացման վրա

Արմինֆո. Բիշքեկում կայացել է Ղրղզստանում համատեղության կարգով (նստավայրը՝ Աստանա) Հայաստանի դեսպան Արմեն Ղևոնդյանի  հանդիպումը Ղրղզստանի տրանսպորտի և կոմունիկացիաների նախարար Աբսատտար Սիրգաբաևի հետ։

Ինչպես ԱրմԻնֆո-ին հաղորդել են Ղազախստանում ՀՀ դեսպանության մամուլի ծառայությունից, ՀՀ ու ՂրՀ միջև տրանսպորտի ոլորտում փոխգործակցության զարգացման՝ երկու երկրների միջև փոխադարձ ապրանքաշրջանառության ծավալի աճի և տարանցիկ ներուժի ավելացման շեշտադրմամբ, դիտարկվել է նոր փոխշահավետ, այդ թվում՝ մուլտիմոդալ տրանսպորտային կապուղիների վերհանմանը միտված քայլերի և գործողությունների հերթականությունը։

Դեսպան Ա․Ղևոնդյանը հանդիպմանը ներկայացրել է Հարավային Կովկասում բոլոր տրանսպորտային կապերի ապաշրջափակման նպատակով պաշտոնական Երևանի կողմից ձեռնարկվող քայլերը։ Իր հերթին՝ նախարար Ա․Սիրգաբաևը տեղեկացրել է Ղրղզստանի կառավարության՝ նոր կապուղիների շինարարության և դիվերսիֆիկացման ծրագրերի մասին, որոնք կարող են ընդլայնել փոխկապակցվածությունն ինչպես բուն Կենտրոնական Ասիայում, այնպես էլ ավելի լայն համատեքստում։

Հանդիպման արդյունքներով վերահաստատվել է պատրաստակամությունն առ սերտ երկխոսություն՝ միտված տնտեսական փոխգործակցության կտրվածքով պահանջարկ վայելող հեռանկարային երթուղիների մասով առաջարկների մշակմանը և հետագա իրագործմանը։

Ավելի վաղ Արմեն Ղևոնդյանն այցելել էր «Արտահանման զարգացման և առաջմղան «Кыргыз Экспорт» կենտրոն», որտեղ ծանոթացել էր վերջինիս գործունեության հիմնական ուղղությունների հետ։

Կենտրոնի տնօրեն Ուրմատ Տակիրովի հետ կայացած հանդիպմանը հայ-ղրղզական առևտրատնտեսական համագործակցության առաջմղման համատեքստում կառուցողական մթնոլորտում դիտարկվել են ՀՀ դեսպանության և «Кыргыз Экспорт»-ի միջև փոխգործակցությանն առնչվող հարցեր՝ միտված երկու պետությունների տնտեսվարող սուբյեկտներին գործնական աջակցություն ցուցաբերելուն՝ երկարաժամկետ գործընկերական հարաբերությունների հաստատման, ինչպես նաև ապրանքների ու ծառայությունների փոխադարձ մատակարարման օպտիմալ շղթաների մշակման հարցերում։

Ղրղզական Հանրապետության էկոնոմիկայի և առևտրի նախարարությանն առընթեր «Արտահանման զարգացման և առաջմղան «Кыргыз Экспорт» կենտրոն»-ը ստեղծվել է 2023թ․-ին՝ արտահանման զարգացման և առաջմղման գործառույթների իրականացման որակի և արդյունավետության բարձրացման, արտահանման ներուժի և հայրենական արտադրողների մրցունակության ամրապնդման նպատակներով։