Արմինֆո. Երևանում ազդարարվել է "Մտավոր սեփականությունը՝ որպես հայկական գինեգործության կայուն զարգացման շարժիչ ուժ" ծրագրի մեկնարկը, որի հիմնական նպատակն է բարձրացնել մտավոր սեփականության ոլորտում գիտելիքների և հմտությունների կիրառման մակարդակը գինի արտադրողների շրջանում, ինչը կնպաստի նրանց արտադրանքի արժեքի և մրցունակության բարձրացմանը:
Ծրագրի մեկնարկի կապակցությամբ տեղի է ունեցել աշխատանքային խորհրդակցություն Մտավոր սեփականության համաշխարհային կազմակերպության ղեկավարի տեղակալի, Հայաստանի գինեգործության և խաղողագործության հիմնադրամի նախագահի, Հայաստանի մտավոր սեփականության գրասենյակի ղեկավարի, Զբոսաշրջության կոմիտեի ղեկավարի մասնակցությամբ:
Խորհրդակցության ընթացքում ներկայացվել են Հայաստանի խաղողագործության և գինեգործության ոլորտում առկա իրավիճակն ու հեռանկարները, ինչպես նաև մտավոր սեփականության դերը հայկական գինեգործության ինքնության, բրենդինգի և հեղինակության ձևավորման գործում:
ՀՀ վիճակագրական կոմիտեի տվյալներով՝ 2024թ. հունվար-սեպտեմբերին Հայաստանում գինու արտադրությունը նվազել է 27,5% - ով ՝ կազմելով 7,4 մլն լիտր։
