Հայաստանը Հունգարիայի հետ տնտեսական համագործակցության մասին համաձայնագիր կստորագրի

Արմինֆո. Հայաստանի կառավարությունը դեկտեմբերի 19-ի հերթական նիստում հավանություն է տվել Հունգարիայի կառավարության հետ տնտեսական համագործակցության մասին համաձայնագիր ստորագրելու առաջարկությանը:

Ինչպես ասվում է փաստաթղթի հիմնավորման մեջ, «Հայաստանի Հանրապետության կառավարության և Հունգարիայի կառավարության միջև տնտեսական համագործակցության մասին» համաձայնագիրը հնարավորություն է ընձեռում իրավահավասարության և փոխշահավետության հիման վրա երկու երկրների միջև զարգացնել և խորացնել երկարատև տնտեսական հարաբերություններ այնպիսի բնագավառներում, ինչպիսիք են առևտուրը, դեղագործական արդյունաբերությունը, զբոսաշրջությունը, էներգետիկան, տրանսպորտ և նյութատեխնիկական ապահովում, գյուղատնտեսություն և անտառատնտեսություն, հետազոտություն և նորարարություն, շրջակա միջավայրի պաշտպանություն և ջրային ռեսուրսների կառավարում և փոխադարձ հետաքրքրություն ներկայացնող համագործակցության այլ ոլորտներ։

Համաձայնագիրը հանդիսանում է տնտեսական բնույթի տիպային Համաձայնագիր, որն ուղղված է երկու երկրների միջև փոխշահավետ համագործակցության զարգացմանը, տնտեսական կապերի ընդլայնման համար բարենպաստ պայմանների ստեղծմանը, գործարար ակտիվության բարձրացմանը, երկու երկրների տնտեսական համագործակցության ասպարեզում առկա ներուժի օգտագործմանը: Նման բովանդակության համաձայնագրեր Հայաստանի Հանրապետության կառավարությունը կնքել է բազմաթիվ երկրների հետ:

Համաձայնագրով նախատեսվում է փոխշահավետ համագործակցության զարգացումն ու դիվերսիֆիկացումը փոխադարձ հետաքրքրություն ներկայացնող տնտեսական բոլոր ոլորտներում:

Համաձայնագրով նախատեսվում է նաև Հայաստանի Հանրապետության և Հունգարիայի միջև համատեղ տնտեսական միջկառավարական հանձնաժողովի  ստեղծումը՝ երկկողմ առևտրատնտեսական համագործակցությունը համակարգելու և խթանելու նպատակով:

Համաձայնագիրը համահունչ է Հայաստանի Հանրապետության կողմից որդեգրած արտաքին տնտեսական քաղաքականության հիմնական ուղղություններին և նպատակներին:

Նաեւ նշվում է, որ նախագծի ընդունումը բխում է ՀՀ կառավարության 2021-2026թթ. գործունեության միջոցառումների ծրագրի՝ Էկոնոմիկայի նախարարության բաժնի 6-րդ կետից՝ «Միջազգային առևտրատնտեսական համագործակցության ընդլայնում և խորացում» միջոցառումից:

Նշենք, որ, ըստ վիճակագրական տվյալների,  Հունգարիայի հետ ՀՀ առևտրաշրջանառությունը կազմել է 23,1 մլն դոլար (14,2% աճ)։ Հայաստանից արտահանումն աճել է 9,5 տոկոսով՝ մինչեւ 763,1 հազար դոլար, իսկ ներմուծումը ՀՀ հասել է 22,3 մլն դոլարի՝ 14,4 տոկոս աճով։

Հիշեցնենք, որ 2012 թվականին Հունգարիայի վարչապետ Վիկտոր Օրբանն Ադրբեջանին էր վերադարձրել Ռամիլ Սաֆարովին, որը կացնահարել էր հայ սպա Գուրգեն Մարգարյանին, ով զինվորական դասընթացներ էր անցնում Հունգարիայում: Դրանից հետո Հայաստանի այն ժամանակվա քաղաքական ղեկավարությունը սառեցրել էր դիվանագիտական հարաբերություններն այդ երկրի հետ։

Արարատ Միրզոյանի և Հունգարիայի իր պաշտոնակից Պետեր Սիյարտոյի հանդիպման արդյունքում (2022 թվականի դեկտեմբերի 1) կողմերը պայմանավորվածություն էին ձեռք բերել լիարժեք դիվանագիտական հարաբերությունները վերականգնելու վերաբերյալ՝ մտադրություն հայտնելով նոր էջ բացել փոխադարձ վստահության և միջազգային իրավունքի հանդեպ հարգանքի վրա հիմնված հայ-հունգարական հարաբերություններում։ 2023 թվականի մայիսին Հայաստանն Աշոտ Սմբատյանին նշանակել է Հունգարիայում ոչ ռեզիդենտ դեսպան։ Նոյեմբերի 28-ին ՀՀ կառավարության նիստում որոշում է կայացվել Հունգարիայում ՀՀ դեսպանություն բացելու մասին: