Հայաստանի արհմիությունների ղեկավար. Աշխատաժամանակի կրճատումը կամ ավելացումը չի ազդի երկրի տնտեսական աճի վրա

Արմինֆո. Չնայած Հայաստանում առկա աշխատանքային գրաֆիկի ձևաչափին՝ տնտեսական աճը մնում է աննշան, և, նույնիսկ, հաշվի առնելով համախառն ներքին արդյունքի (ՀՆԱ) աճը, երկրի բնակիչները չեն զգում դրա դրական ազդեցությունն իրենց կյանքի վրա: Այդ մասին հայտարարել է Հայաստանի արհմիությունների կոնֆեդերացիայի նախագահ Էլեն Մանասարյանը՝ ութժամյա աշխատանքային օրվանից յոթժամյա աշխատանքային օրվա անցնելու ռիսկերի քննարկմանը նվիրված մամուլի ասուլիսում:

Մասնավորապես, Մանասարյանը նշեց, որ ռիսկեր կարող են առաջանալ նաև ութժամյա աշխատանքային օրվա շրջանակներում, և պարտադիր չէ, որ կապված լինեն դրա կրճատման հետ: Նա ընդգծել է, որ խնդիրը շատ ավելի լայն է. աշխատանքի գործող ձեւաչափի դեպքում գործատուները ոչ միշտ են պահպանում սահմանված ժամանակը, եւ շատ քաղաքացիներ ստիպված են ավելի երկար աշխատել, ընդ որում, լրացուցիչ ժամերը հաճախ չեն գրանցվում:

"Վստահություն չկա, որ յոթժամյա աշխատանքային օրվա անցումը կլուծի այս խնդիրը։ Սակայն նման քայլը կարող է նաև դրական կողմեր ունենալ գործատուների համար։ Պետք է հասկանալ, որ նույնիսկ 8-ժամյա գրաֆիկով աշխատողը միշտ չէ, որ զբաղված է բոլոր ութ ժամերի ընթացքում: Մեր ժամանակներում աշխատանքային գործիքները զգալիորեն կատարելագործվել են, և կարիք չկա, որ մարդն անընդհատ աշխատի ողջ աշխատանքային օրվա ընթացքում", - պարզաբանել է կոնֆեդերացիայի նախագահը։

Խոսելով այն մասին, որ շատերն ավելի արդիական են համարում Հայաստանում սպառողական զամբյուղի եւ նվազագույն աշխատավարձի խնդիրները, Մանասարյանն ընդգծել է, որ այդ խնդիրներից յուրաքանչյուրի քննարկումը կարեւոր է, եւ չի կարելի դրանցից որեւէ մեկը առանձնացնել՝ որպես ավելի առաջնային:

"Մեզ համար սա ևս կարևոր խնդիր է, քանի որ մարդկանց մեծ մասը միջինից ցածր աշխատավարձ է ստանում ։ Նույնիսկ եթե ՀՆԱ-ի աճ է արձանագրվում, այն հավասարաչափ չի բաշխվում աշխատողների շրջանում։ Ուստի չկան առաջնահերթ խնդիրներ, եւ չի կարելի կենտրոնանալ դրանցից միայն մեկի վրա", - հավելել է նախագահը։

Ճշտմանը, թե արդյոք դա կարող է ազդել հաստիքները կրճատելու գործատուների որոշման վրա, նա պարզաբանել է, որ նման խնդիր արդեն գոյություն ունի նաեւ 8-ժամյա աշխատանքային օրվա դեպքում: Այդ առնչությամբ Մանասարյանը նշել է, որ Հայաստանի արհմիությունների կոնֆեդերացիան բազմաթիվ բողոքներ է ստանում աշխատողներից, որոնք ստիպված են փոխարինել արձակուրդում գտնվող իրենց գործընկերներին՝ դրա դիմաց չստանալով լրացուցիչ վարձատրություն:

"Նրանք ստիպված են մեծ ծավալի աշխատանք կատարել ութժամյա գրաֆիկի շրջանակներում, ինչի պատճառով աշխատում են նաև 10-ական ժամ՝ այն դեպքում, երբ ոչ ոք չի փոխհատուցում իրենց աշխատանքի դիմաց: Այդ պատճառով մենք նաեւ խոսում ենք այդ գործընթացների նկատմամբ վերահսկողությունը բարձրացնելու անհրաժեշտության մասին՝ առաջացած խնդիրները լուծելու համար", - հավելել Է Մանասարյանը։

Իր հերթին՝ աշխատանքի և սոցիալական հարցերի փոխնախարար Ռուբեն Սարգսյանը, անդրադառնալով առանց նախնական հետազոտությունների նման աշխատանքային ձևաչափի ներդրման նպատակահարմարությանը, և հաշվի առնելով Հայաստանի պայմանները, նշել է, որ համաշխարհային պրակտիկան բազմազան է, և որոշ երկրներում աշխատաժամանակը, նույնիսկ, ավելանում է: Դիտարկմանը՝ թե ինչու է օրենքի նախագիծն իրականացվել առանց Հայաստանում նման ուսումնասիրություն անցկացնելու, փոխնախարարը պարզաբանել է, որ ոչ բոլոր նախագծերը, որոնք քննարկվում կամ քննարկման են դրվում, պետք է հիմնված լինեն երկրի ներսում իրավիճակի վերլուծության վրա, եթե կան ավելի զարգացած երկրներում հաջողված օրինակներ:

"Մենք, հիմնականում, ձգտում ենք ուսումնասիրել զարգացած երկրների օրինակները՝ հաշվի առնելով նրանց ձեռքբերումներն ու հաջող փորձը այդ ուղղությամբ։ Ես ճիշտ եմ համարում ձգտել դեպի այն երկրները, որտեղ մարդը գլխավոր արժեք է", - եզրափակել է Սարգսյանը։