Արմինֆո. Եկամուտների համընդհանուր հայտարարագրումը լրացուցիչ բեռ կդառնա Հայաստանի ցանկացած աշխատող քաղաքացու համար։ Չմոռանանք նաև, որ Հայաստանում շատ "աշխատող աղքատներ" կան։ Այդ մասին հունվարի 24-ին հայտարարել է Հայաստանի արհմիությունների կոնֆեդերացիայի նախագահ Էլեն Մանասերյանը՝ «Ի՞նչ խնդիր է իրականում լուծում համընդհանուր եկամտի հայտարարագիրը» թեմայով քննարկման ժամանակ։
Մանասերյանը հիշեցրել է, որ ֆիզիկական անձը էլեկտրոնային ծառայությունների միասնական համակարգի միջոցով եկամուտների հայտարարագիր ներկայացնելու համար պետք է ունենա էլեկտրոնային նույնականացում և էլեկտրոնային ստորագրություն: Էլեկտրոնային ստորագրություն ստանալու համար անհրաժեշտ կլինի վճարել 3 հազար դրամ (եւս 3 հազար պետք է վճարել տարեկան, որպեսզի ծառայությունն ակտիվ լինի):
Եվս 500 դրամ պետք է վճարել բջջային հեռախոսով նույնականացում անցնելու համար։ Բացի այդ, կան պոտենցիալ ծախսեր, որոնք աշխատող քաղաքացին պետք է հոգա, հավելել է նա (նույնականացման քարտ ստանալու համար՝ երեքշաբաթյա ժամկետում 3 հազար դրամ - խմբ.):
"Սա լրացուցիչ ֆինանսական բեռ է այն քաղաքացիների համար, ովքեր իրենց համեստ աշխատավարձով չեն նախատեսել այդ ծախսերը", - նշել է նա:
Արդյունավետ չի լինի նաև իշխանությունների առաջարկած սոցիալական ծախսերի փոխհատուցման համակարգը, որը քաղաքացիները կարող են ստանալ առողջապահության և կրթության ոլորտում իրենց, իրենց և ընտանիքի անդամների համար կատարված ծախսերի դիմաց: Արհմիությունների կոնֆեդերացիայի նախագահի կարծիքով, երկրի իշխանություններն, իրականում, պատկերացում չունեն վերը նշված ուղղություններով քաղաքացիների ծախսերի մասին: Մանասերյանը համոզված է, որ չկան իրական հաշվարկներ, որոնց հիման վրա որոշվել է ստացվող սոցիալական ծախսերի շեմը։
Միևնույն ժամանակ, նա կարծում է, որ համակարգը չի ծառայի հայտարարված նպատակին՝ ավելի հասցեական դարձնել քաղաքացիներին սոցիալական աջակցությունը տարբեր պետական աջակցության ծրագրերի շրջանակներում:
Նշենք, որ եթե դուք Հայաստանի Հանրապետության ռեզիդենտ և քաղաքացի եք և 2024 թվականի ընթացքում եղել եք վարձու աշխատող (աշխատանքային պայմանագրով) կամ աշխատել եք քաղաքացիաիրավական պայմանագրով և այդ պայմանագրի շրջանակում ստացել եք եկամուտ, որից եկամտահարկ է պահվել, կամ 2024 թվականին ներկայացրել եք հայտարարագիր 2023 թվականիհամար, ինչպես նաև 2025 թվականին հարկային հայտարարագիր ներկայացնող հարկատուների այլ խմբերի շարքին եք դասվում (ամբողջական ցանկն այստեղ՝ https://src.am/am/getNews/833), ապա դուք պետք է տարեկան հարկային հայտարարագիր ներկայացնեք մինչև 2025 թվականի մայիսի 1-ը:
Տարեկան հարկային հայտարարագիրը սահմանված ժամկետում չներկայացնելու դեպքում հարկային ծառայությունը ձեզ նախազգուշացում է ուղարկում: Այնուհետև, զգուշացումից հետո 30 օրվա ընթացքում հայտարարագիր չներկայացնելու դեպքում ստիպված եք լինելու վճարել 5 հազար դրամ տուգանք (պաշտոնյաներն և գործարարները՝ 50 հազար), ևս մեկ ամիս անց՝ կրկնակի ավել: Իսկ եթե դուք ներկայացրել եք հայտարարագիր, և դրանում սխալներ կան, ապա կարող եք փոփոխություններ կատարել դրանում՝ մինչև փաստաթղթի վերջնական հաստատումը: Բայց, եթե, նույնիսկ, հայտարարագիրը լրացնելիս սխալներ եք թույլ տվել, հարկայինը խոստանում է ձեզ տեղեկացնել այդ մասին և հնարավորություն տալ դրանք շտկելու:
