Ամունդի ներդրումային հեռանկարներ 2025 թ․։ Ռիսկերի խելամիտ կառավարման ուղիներ ու ռազմավարական մոտեցում

Արմինֆո. Հունվարի 30-ին Երևանը հյուրըկալեց «Ամունդի ներդրումային հեռանկարներ 2025» գլոբալ նախաձեռնությունը, որը տեղի է ունենում ավելի քան 20 երկրներում։ Ներդրող լինեք, ֆինանսական մասնագետ, թե մարդ, ով պարզապես ցանկություն ունի հասկանալ գլոբալ տնտեսական տեղաշարժերը – այս միջոցառումը յուրահատուկ հնարավորություն է հայտնի միջազգային փարձագետների հետ քննարկելու հիմնական ֆինանսական զարգացումները, որոնք ձևավորելու են ընթացիկ տարին, ինչպես նաև լսել նրանց տեսակետները ներդրումային հնարավորությունների, տնտեսական միտումների և ակտիվների բաշխման ռազմավարությունների մասին։

«Ամենուր խոսվում է անորոշության շատ բաձր մակարդակի մասին, բայց ի տարբերություն 2024-ի, 2025-ի անորոշությունը կապված է տնտեսության հետ, կամ ավելի ճիշտ այն քայլերի, որ գործնականում կձեռնարկի ԱՄՆ նորընտիր նախագահը», - իր բացման խոսքում նշում է Ամունդի Ներդրումային ինստիտուտի մակրո քաղաքականության հետազոտությունների ղեկավար Դիդիե Բորովսկին և հավելում՝ վերջին տարիներին գլոբալ տնտեսությունն ապացուցել է իր դիմակայունությունը։

Ամեն դեպքում, նշում է նա, այսօրվա բարդ ու փոփոխական տնտեսական միջավայրում լավատեսությունը մեր ուղեկիցն է։ Այսպես՝ չնայաց դեռևս առկա գնաճային ճնշումներին, գլոբալ մակարդակում պատկերը վկայում է, որ այն արդեն իսկ հասել է իր պիկին և հիմա գնում է դեպի նվազում։ Բացի դա, Դիդիե Բորովսկու գնահատմամբ, Թրամփի երկրորդ պաշտոնավարման ժամանակաշրջանը աչքի չի ընկնի կտրուկ փոփոխություններով, նա ավելի զգուշորեն է գործելու։ Սակագնային քաղաքականության մասով նույնպես չեն լինի կտրուկ շարժեր, ընթացքը կրելու է աստիճանական բնույթ և կիրառվելու է ոչ բոլոր երկրների հանդեպ, քանի որ Սպիտակ տանն էլ գիտակցում են, որ դա կարող է շոկային լինել հենց ԱՄՆ տնտեսության համար։

«Գլոբալ ֆինանսական հոսքերը կայունանում են, բայց հաջողության համար կարևոր է ռիսկերի խելամիտ կառավարումն ու ռազմավարական մոտեցումը», - նշում է փորձագետը։

«Այս սպահին շուկան «լավն է», իրացվելի, վարկային միջավայրն էլ բերանպաստ ընկերությունների համար։ Ընձեռնված հնարավորություններից լավագույնս օգտվելու համար պետք է լինել խիստ զգուշավոր, բայց և պրոակտիվ», - իր հերթին նշում է Ամունդիի Պատվիրակված ներդրումային լուծումների բաժնի համաղեկավար Ֆրեդերիկ Պասկալը՝ ներկայացնելով Ամունդիի ակտիվների բաշխման տեսլականը 2025-ի համար։

Ըստ այդմ, «Ամունդին» գրեթե բոլոր շուկաներում երկնիշ աճ է ակնկալում՝ ԱՄՆ, Միացյալ Թագավորություն, Եվրոպա և Ճապոնիա։ «2025 թ-ին ակնկալում ենք շուկաների վերականգնում, բացառությամբ «հրաշալի յոթնյակի», - հայատարարում է Ֆրեդերիկ Պասկալը։

«2025 թ-ին մենք մեր կողմից կառավարվող ֆոնդերի ներդրումները ձևավորելիս շարունակելու ենք նախապատվություն տալ կորպորատիվ պարտատոմսերի իրական սեկտորի թողարկումներին և նոր հնարավարություններ ենք փնտրելու այդ ուղղությամբ», - իր կողմից հավելում է Ամունդի-Ակբա ֆոնդերի կառավարիչ Անուշ Ամիրջանյանը՝ անդրադառնալով 2025թ-ի ներդրումային հնարավորություններին և մարտահրավերներին։

Ըստ նրա, ընթացիկ տարում հեջավորումը առանցքային դեր է խաղալու։ Ինչ վերաբերում է Հայաստանյան հեռանկարներին, ապա նրա խոսքով, Ամունդին կարևորում է իրական տնտեսության մեջ կատարվող ներդրումները, և 2025թ-ին ընկերությունն իր ջանքերն ուղղելու է ինչպես մասնավոր հատվածի պարտատոմսերում ներդրումների իրականացմանը, այնպես էլ խոշոր ենթակառուցվածքային ծրագրերում ներդրումային հնարավորությունների ստեղծմանը։

Նշենք, որ նախորդ տարի լրացավ Հայաստանում Պարտադիր կուտակային կենսաթոշակային համակարգին (ՊԿԿՀ) ներդրման ուղիղ 10 տարին։ Մինչ օրս համակարգի շրջանակներում ՀՀ ԿԲ-ի կողմից կենսաթոշակային միջոցների կառավարման լիցենզիա ստացած կառավարիչների թիվն ընդամենը երկուսն է՝ «Ամունդի-Ակբա Ասեթ Մենեջմենթ» (Amundi-ACBA) և «Ցե-Կվադրատ Ամպեգա Ասեթ Մենեջմենթ Արմենիա» (C-Quadrat Ampega):

Ամունդի-Ակբա Ասեթ Մենեջմենթը հիմնադրվել է 2013թ.՝ ֆրանսիական Ամունդի և Ակբա Բանկի (Հայաստանի խոշորագույն առևտրային բանկերից է) կողմից: Մոտ 2,2 տրիլիոն եվրո կառավարման ներքո ակտիվներով Ամունդին Եվրոպայի առաջատար ակտիվների կառավարիչն է: 2024 թ-ի վերջի դրությամբ Ամունդի - Ակբա երեք կենսաթոշակային ֆոնդերի մասնակիցների թիվը հասել է 510 հազարի, կառավարվող ակտիվների ծավալը 2024թ․ դեկտեմբերի 30-ի դրությամբ՝ 567 մլրդ դրամի կամ մոտ 1,4 մլրդ եվրո (տարեկան աճը միջինում գնահատվում է 30-40%)։ 2024-ին ֆոնդերի եկամտաբերությունը կազել է 8,1-10,3%, ստեղծման պահից միջին տարեկան եկամտաբերությունը կազմել է մոտ 7.2-7.8%: