ԿԶԵՀ-ը 2 մլն դոլարի դրամաշնորհ կտրամադրի Հայաստանին՝ ՀՀ պետական ֆինանսների կառավարման արդյունավետության բարձրացման նպատակով

Արմինֆո. ՀՀ կառավարության այսօրվա նիստում գործադիրը հավանություն է տվել «Հայաստանի Հանրապետության և Եվրասիական զարգացման բանկի միջև «Հայաստանի Հանրապետության հանրային հատվածի կազմակերպությունների ֆինանսական հաշվետվությունների որակի բարձրացում» նախագծի ֆինանսավորման համար Կայունացման և զարգացման եվրասիական հիմնադրամի միջոցներից դրամաշնորհի տրամադրման մասին» համաձայնագրին կից լրացուցիչ թիվ 1 համաձայնագիրը հաստատելու մասին» ՀՀ նախագահի հրամանագրի նախագծին:

Ինչպես ասվում է փաստաթղթին կից պարզաբանման մեջ, "Հայաստանի Հանրապետության պետական հատվածի կազմակերպությունների ֆինանսական հաշվետվությունների որակի բարելավում" նախագծի ֆինանսավորման համար Կայունացման եւ զարգացման եվրասիական հիմնադրամի միջոցներից 2 մլն դոլարի չափով դրամաշնորհ տրամադրելու մասին համաձայնագիրն ստորագրվել է 2024 թվականի փետրվարի 6-ին եւ ուժի մեջ է մտել օգոստոսի 2-ին:

Ըստ հիմնավորման՝ համաձայնագրով նախատեսված ծրագրի իրականացման նպատակն է՝ նպաստել ՀՀ-ում պետական ֆինանսների կառավարման արդյունավետության բարձրացմանը։ Համաձայնագրով նախատեսված Կայունացման և զարգացման եվրասիական հիմնադրամի դրամաշնորհային միջոցների հաշվին նախատեսվում էր ՀՀ հանրային հատվածի կազմակերպությունների ֆինանսական հաշվետվությունների համախմբման մեթոդաբանության և գործիքակազմի մշակում, ՀՀ առողջապահության նախարարության և նրան ենթակա ՊՈԱԿ-ների համախմբված ֆինանսական հաշվետվությունների պատրաստման նպատակով համապատասխան ծրագրային ապահովման մշակում (ձեռքբերում), ինչպես նաև այդ հաշվետվությունները պատրաստող մասնագետների համապարփակ ուսուցման կազմակերպում։