Արմինֆո. Հայաստանի իշխանությունները մտադիր են մեղմել երկրի կենսաթոշակային հիմնադրամների որոշ սահմանափակումներ՝ դրանց միջոցները տնտեսության իրական հատվածում ներդնելու համար։ ՀՀ Ազգային ժողովի ֆինանսավարկային եւ բյուջետային հարցերի հանձնաժողովը փետրվարի 10-ի արտահերթ նիստում դրական եզրակացություն է տվել "Կուտակային կենսաթոշակների մասին" օրենքում ՀՀ կառավարության ներկայացրած փոփոխություններին:
Ներկայացնելով փոփոխությունները' ՀՀ Կենտրոնական բանկի նախագահի տեղակալ Արմեն Նուրբեկյանը նշել է, որ մինչեւ երկրորդ ընթերցում ստացվել է տեխնիկական բնույթի ընդամենը մեկ առաջարկ, որը վերաբերում է էլեկտրոնային ծանուցմանը, ինչն իր արտացոլումն է գտել օրենքի նախագծում: Ներկայումս, ինչպես նշել է Նուրբեկյանը, հիմնադրամների համար գոյություն ունեն ներդրումների իրականացման սահմանափակումներ, ինչը թույլ չի տալիս կենսաթոշակային հիմնադրամների միջոցներն ամբողջությամբ ուղղել տարբեր ներդրումային նախագծերին, այդ թվում՝ ենթակառուցվածքների զարգացմանը, ինչպես նաեւ տնտեսության այլ ոլորտների ֆինանսավորմանը: Հայաստանում ներդրումային նախագշերը, հիմնականում, ֆինանսավորվում են ոչ հրապարակային (բորսայում չցուցակված) ֆինանսական գործիքների միջոցով: Ընդ որում, ոչ հրապարակային (չցուցակված) գործիքներում ներդրումներ կատարելու հնարավորությունն ապահովվում է միայն անուղղակիորեն այլ ներդրումային գործիքների միջոցով, ինչը սահմանափակում է բնակչության կենսաթոշակային խնայողությունները տնտեսության մեջ ներդնելու հնարավորությունը, նվազեցնում է ֆոնդերի կառավարման արդյունավետությունը և դրանց բարձր եկամուտների ստացումը:
Օրենքում առաջարկվող փոփոխությունները թույլ կտան ընդլայնել կենսաթոշակային կուտակային հիմնադրամների կողմից ներդրումների հնարավորությունները ՝ ի դեմս երկու ընկերությունների ՝ "Ցե - Կվադրատ Ամպեգա Ասեթ Մենեջմենթ Արմենիա" (C - Quadrat Ampega) և "Ամունդի-Ակբա Ասեթ Մենեջմենթ" (Amundi - ACBA) ՝ հիմնադրամի միջոցները տարբեր ֆինանսական գործիքների կիրառման միջոցով ուղղելով ՀՀ տնտեսության ֆինանսավորմանը: Ներկայումս գործող օրենքում առկա է դրույթ, համաձայն որի, կենսաթոշակային ֆոնդի կառավարիչն իրավունք չունի կառավարելու մասնագիտացված ներդրումային ֆոնդ: Մինչդեռ, Հայաստանի տնտեսությունում կան ֆինանսավորման կարիք ունեցող ճյուղեր, և այդ ներդրումային նախագծերը կարելի է ֆինանսավորել ներդրումային ֆոնդերի հաշվին: Միևնույն ժամանակ, պարտադիր կենսաթոշակային ֆոնդերի կառավարիչներն ունեն տարբեր ներդրումային ֆոնդեր կառավարելու մասնագիտական ունակություններ: Ուստի, օրենսդրական խոչընդոտների վերացումը թույլ կտա օգտագործել այդ հնարավորությունները՝ խթանելով ներդրումները տնտեսության իրական հատվածում։
Ներկայումս կենսաթոշակային հիմնադրամների համար սահմանված որոշ ներդրումային սահմանաչափեր բացասական ազդեցություն են գործում դրանց կառավարման արդյունավետության վրա: Մասնավորապես, պահպանողական ֆոնդերի համար մաասնաբաժնային արժեթղթերում ներդրումների փոքր սահմանը ՝ 25%, թույլ չի տալիս ֆոնդերին օգտվել երկարաժամկետ հեռանկարում բարձր և կայուն եկամտաբերություն ապահովելու հնարավորությունից: Այժմ առաջարկվում է այդ շեմը հասցնել 35 տոկոսի։ Այդպիսով՝ երկրի կենսաթոշակային հիմնադրամները ավելի շատ հնարավորություններ կունենան ԱՄՆ արժեթղթերում ներդրումներ կատարելու համար:
