Արմինֆո. Չնայած այն հանգամանքին, որ ռուս-վրացական սահմանի "Վերին Լարս" անցակետը բաց է տրանսպորտային միջոցների երթևեկության համար, անցակետում կուտակվել է Հայաստանից 324 բեռնատար: Այդ մասին ասվում է Հյուսիսային Օսիայի ճանապարհային երթևեկության կազմակերպման կենտրոնի հաղորդագրության մեջ:
Ինչպես նշում է աղբյուրը, ընդհանուր առմամբ, անցակետով անցնելու համար հերթագրվել է 913 բեռնատար՝ տարբեր երկրներից: Անցակետում հերթն առաջացել է եղանակային պայմանների վատթարացման հետևանքով։
Հիշեցնենք, որ Մցխեթ-Ստեփանծմինդա-Լարս ճանապարհը միակ ցամաքային ճանապարհն է, որը Հայաստանը Ռուսաստանի Դաշնության հետ կապում է Վրաստանի տարածքով տարանցիկ ճանապարհով:
Նշենք նաև, որ 2024 թվականի արդյունքներով "Վերին Լարս" ավտոմոբիլային անցակետը 2024 թվականին Ռուսաստանում բեռնափոխադրումների ծավալներով զբաղեցրել է առաջին տեղը։ Անցակետով փոխադրվել է 4,8 մլն տոննա բեռ, ինչը զգալիորեն գերազանցում է մյուս անցակետերի ցուցանիշները։ Երկրորդ տեղում է "Յարագ-Կազմալյար" անցակետը ՝ 3,7 մլն տոննա փոխադրումների ծավալով։ Առաջատարների եռյակը եզրափակում է Անդրբայկալսկը, որով անցել է 2,5 մլն տոննա բեռ ։
