Ամուլսարի նախագծի ֆինանսավորմամբ հետաքրքրված են միաժամանակ մի քանի բանկեր

Արմինֆո. Բացի հիմնական բանկից, որը ցանկություն է հայտնել ֆինանսավորել Ամուլսարի ոսկու հանքավայրի շահագործումը, մի քանի բանկեր ևս հայտարարել են նախագծի գործարկման համար լրացուցիչ վարկավորման տրամադրման նկատմամբ հետաքրքրության մասին: Այդ մասին փետրվարի 25-ին կայացած մամուլի ասուլիսի ժամանակ լրագրողներին հաղորդել է Հայաստանի բանկերի միության (ՀԲՄ) նախագահ Դենիել Ազատյանը։

Նա մանրամասներ չի հայտնել, քանի որ փոփոխություններ կարող են լինել, բայց նշել է, որ այս պահին ակտիվ բանակցություններ են ընթանում կառավարության հետ՝ ֆինանսավորման պայմանների և ծավալի վերաբերյալ: Նրա ասելով՝ խոսքը 300 մլն դոլարի մասին է։

Հիշեցնենք, որ 2018 թվականի վերջից Ամուլսարի ոսկու հանքավայրի կառուցման աշխատանքները բնապահպանական ակտիվիստների կողմից ենթարկվել են արգելափակման: Կառավարությունն այդպես էլ չկարողացավ կողմնորոշվել դրանց վերսկսման հարցում։

2022 թվականի մարտին Հայաստանի էկոնոմիկայի այն ժամանակվա նախարար Վահան Քերոբյանը նշել էր, որ եթե ոչինչ չխանգարի, ապա Ամուլսարի ոսկու հանքավայրում աշխատանքները կվերսկսվեն, վկայակոչելով գերատեսչության միջոցառումների ծրագիրը, որը պարունակում է "Ամուլսարի խնդրի" լուծման մասին դրույթ։ 2023 թվականի փետրվարին ՀՀ կառավարությունը, "Լիդիան Արմենիա" ՓԲԸ - ն և Եվրասիական զարգացման բանկը (ԵԱԶԲ) ստորագրել են փոխըմբռնման հուշագիր, որն ազդարարել է Ամուլսարի հանքավայրի շահագործման ծրագրի վերագործարկումը: Հուշագրի շրջանակում, ինչպես այն ժամանակ պատմել էր էկոնոմիկայի նախարարը, կներգրավվի 150 մլն դոլար, որից 100 մլն դոլարը՝ ԵԱԶԲ - ի վարկային միջոցներ, 50 մլն դոլար կապահովվի տեղական բանկի կողմից, եւ պայմանագրից դուրս լրացուցիչ 100 մլն դոլար կներդրվի բաժնետերերի կողմից: Միջոցները պետք է ուղղվեին հանքում շինարարական աշխատանքների ավարտին և անհրաժեշտ տեխնիկայի ձեռք բերմանը։ Նշվել է, որ գործարքի շրջանակում Հայաստանի կառավարությունը կստանա ընկերության բաժնետոմսերի 12,5 տոկոսը, որի դիմաց ոչինչ չի վճարի, բայց դրա փոխարեն գործարքը կապահովագրի որոշակի ռիսկերից:

Նշենք, որ Ամուլսարի նախագծի ընդհանուր արժեքը կազմում է շուրջ 400 մլն դոլար: Հանքավայրի շահագործման ժամկետը հաշվարկված է 10,5 տարի, ընդ որում, տարեկան կտրվածքով նախատեսվում է արդյունահանել միջին հաշվով 200 հազար ունցիա ոսկի: Հանքավայրը երկրորդն է Հայաստանում՝ պաշարների մեծությամբ։ Ընկերության տեղեկատվության համաձայն ՝ հանքավայրը պարունակում է մոտ 73733 կգ ոսկի ՝ 0,78 գ/տոննա միջին պարունակությամբ, ինչպես նաև 294.367 տոննա արծաթ՝ 9.29 գ /տոննա միջին պարունակությամբ: Այն գտնվում է Ջերմուկ առողջարանային քաղաքից 13 կմ հեռավորության վրա, Արփայի ու Որոտանի միջագետքում։