Խաղային բիզնեսի հարցում ԱԺ պատգամավորի առաջարկած Հարկային օրենսգրքի փոփոխությունները ենթարկվել են արմատական փոփոխության

Արմինֆո. Ազգային ժողովի "Քաղաքացիական պայմանագիր" խմբակցության պատգամավոր Հայկ Սարգսյանի կողմից երկրորդ ընթերցմամբ առաջարկված Հարկային օրենսգրքի և հարակից օրենքների փաթեթի  փոփոխությունները ենթարկվել են արմատական փոփոխության: Նախկին փոփոխությունները վերաբերում էին խաղային բիզնեսի համար լրացուցիչ 10 տոկոս շրջանառության հարկի կիրառմանը։

Մարտի 6-ին ԱԺ լիագումար նիստում, որի ընթացքում փաթեթն ընդունվել է երկրորդ և վերջնական ընթերցմամբ, պատգամավորը նշել է, որ կառավարության և ՀՀ վարչապետ Նիկոլ Փաշինյանի հետ ակտիվ քննարկումների արդյունքում որոշում է կայացվել շրջանառության հարկը փոխարինել պետական տուրքով: Ընդ որում, օրինագիծն ուժի մեջ կմտնի ապրիլի 1-ից, այլ ոչ թե՝ վեց ամիս  անց, ինչպես նախատեսված էր ի սկզբանե։ Ներկայումս գործող դրույթի համաձայն, վիճակախաղի ժամանակ խաղադրույք կատարելու իրավունք ձեռք բերելու դեպքում յուրաքանչյուր խաղադրույքի համար սահմանվել է 0.1% պետական տուրք, իսկ շահումով խաղերի դեպքում՝ 0.175%: Նորամուծությամբ նախատեսվում է պետական տուրքի չափը բարձրացնել, համապատասխանաբար, մինչեւ 0,2 եւ 0,35 տոկոս:

"Գործադիրի ղեկավարը նաեւ առաջարկել է այդ վճարումների առաջանցիկ աճ սահմանել մինչեւ մոնիթորինգային օպերատորի համակարգի գործարկման պահը։ Ֆինանսների նախարարությունն արդեն ձևակերպել է համապատասխան առաջարկի տարբերակը։ Դրանում նախատեսված է, որ ապրիլի 1-ից վճարը պետք է կրկնապատկվի ։ 2026 թվականի հունվարի 1 - ից, եթե մենք մինչ  այդ օպերատոր չունենանք, պետական տուրքը հերթական անգամ կբարձրացվի", - նշել է զեկուցողը։

Սարգսյանը տեղեկացրել է, որ եթե ընկերությունները գնան շրջանառության ծավալների արհեստական նվազման ճանապարհով, ապա ինքը նոր օրենսդրական փոփոխություն կմտցնի ՝ ուղղված հարկային բեռի ավելացմանը:

Զեկուցողը նաև նշել է, որ փոփոխությունների կիրառման արդյունքում երկրի պետական բյուջե է մուտքագրվելու ամսական մոտ 2,7 մլն դոլար:

ՀՀ ֆինանսների փոխնախարար Արման Պողոսյանը, իր հերթին, հայտարարել է, որ կառավարությունը չի առարկում առաջարկվող փոփոխությունների կիրառման դեմ: Նա կոչ է արել հաստատել օրենսդրական փաթեթը՝ իր ներկայիս տեսքով:

Նշենք, որ նախօրեին խաղային բիզնեսի հարցին անդրադարձել էր նաև ՀՀ վարչապետ Նիկոլ Փաշինյանը: ՀՀ Ազգային ժողովում կառավարության ժամի ընթացքում նա հայտարարել էր, որ կառավարությունը մտադիր չէ "ռեպրեսիվ" հարկային դրույքաչափեր սահմանել խաղային բիզնեսի ընկերությունների նկատմամբ, բայց եւ մտադիր չէ աչք փակել առկա խախտումների վրա: "Խորհրդակցություններից մեկի ժամանակ ես ասել եմ, որ թող այդ ընկերությունները փակվեն, եթե մյուս նժարին հասարակության անվտանգությունն է։ Բայց հույզերը մի բան են, և որոշումները պետք է լինեն ռացիոնալ: Ընկերությունից շահույթի 105 տոկոսի հարկ գանձելը ճիշտ չէ", - նշել է Փաշինյանը, կարեւորելով մոնիտորինգային օպերատորի ձեւավորումը, որը կարձանագրի բոլոր խաղադրույքները առցանց խաղատներում ։ Մրցույթի միջոցով օպերատորի ընտրությունը նախատեսվում է իրականացնել 2025 թվականին:

Փաշինյանն ընդգծել է, որ նոր մեխանիզմը հնարավորություն կտա արգելափակել խաղային կայքերի հասանելիությունը սոցիալապես խոցելի և պետական նպաստ ստացող քաղաքացիների համար: