Արմինֆո. Եվրասիական զարգացման բանկը Հայաստանի ֆինանսների նախարարությանը տեխնիկական աջակցություն կցուցաբերի՝ գերատեսչության աշխատակիցների որակավորման բարձրացման համալիր ծրագրի իրականացման համար: Հայաստանի կառավարությունը մարտի 6-ի նիստում հավանություն է տվել նախագծի իրականացմանը։
Կառավարության հիմնավորման մեջ նշվում է, որ ծրագրի նպատակն է նպաստել Ֆինանսների նախարարության կադրային ներուժի, աշխատակիցների մասնագիտական հմտությունների զարգացմանը, ինչը կխթանի աշխատանքի արդյունավետության բարձրացումը: Հաշվի առնելով բացահայտված կարիքները՝ ծրագրի շրջանակում նախատեսվում է վերապատրաստել միջին օղակի 55 մենեջերների։ Մասնավորապես, նախատեսվում է իրականացնել իրավիճակային խնդիրների մեթոդաբանության հիման վրա հմտությունների ձևավորման կրթական միջոցառումներ:
Կրթական ծրագրերը, ի թիվս այլ միջոցառումների, կներառեն հրավիրված փորձագետների կողմից անհատական և խմբային ուսուցում, այդ թվում ՝ փորձի փոխանակման եղանակով, ինչը թույլ կտա բացահայտել սովորողների անձնական որակները, ներուժն ու աճի հնարավորությունները, ստեղծել համագործակցության մթնոլորտ և զարգացնել հաղորդակցման հմտությունները:
Ծրագրի տեղեկատվական բաղադրիչի իրականացման համար ծրագրի շրջանակում կանցկացվի նաև ամփոփիչ միջոցառում՝ հրավիրված ԵԱԶԲ մասնագետների հետ:
