Հայաստանում փաստաբանական գրասենյակների մասնագիտական գործունեությունը կտեղափոխվի ԱԱՀ դաշտ

Արմինֆո. Հայաստանում նախատեսվում է սահմանափակել այն գործունեության տեսակները, որոնք 2025 թվականի հուլիսի 1-ից շրջանառության հարկից պետք է անցնեն ԱԱՀ դաշտ ։ ՀՀ Ազգային ժողովը մարտի 26-ի լիագումար նիստում երկրորդ եւ վերջնական ընթերցմամբ փոփոխություններ է կատարել ՀՀ հարկային օրենսգրքում:

Ինչպես իր ելույթում նշել է ՀՀ ֆինանսների նախարարի տեղակալ Արման Պողոսյանը, առաջին ընթերցման համեմատ օրենսգրքում էական փոփոխություններ են կատարվել: Մասնավորապես, շրջանառության հարկից ընդհանուր հարկային դաշտ կտեղափոխվեն իրավաբանական գրասենյակները, հաշվապահական գործունեությունը, ընկերությունների գլխամասային գրասենյակների գործունեությունը, պետական կառավարման համակարգում խորհրդատվական ծառայությունները, ժամանակավոր աշխատողներին աշխատանքով ապահովող ընկերությունների գործունեությունը, վարձու աշխատողներին աշխատանքով ապահովող այլ գործունեություն: Ընդհանուր հարկման դաշտ կտեղափոխվեն նաեւ մարզերում ուղեւորափոխադրումները։

Մեկ այլ հիմնական փոփոխությունը, ինչպես նշել է փոխնախարարը, վերաբերում է անվճար իրավաբանական օգնություն ցուցաբերող փաստաբանական գրասենյակներին: Մասնավորապես, նման օգնություն ցուցաբերելիս օրինագծով նախատեսվում են բացառություններ։ Այսպես, եթե անվճար օգնության ծավալները չգերազանցեն փաստաբանական գրասենյակների կողմից ստացվող ֆինանսական միջոցների ընդհանուր ծավալի 5 տոկոսը, ապա այդ միջոցները չեն հարկվի ԱԱՀ-ով։

Առաջարկվող միջոցառումները, ինչպես ընդգծել է փոխնախարարը, ուղղված են այն բանին, որ գործունեության այդ տեսակները փաստաթղթավորվեն։

Իր հերթին՝ ԱԺ տնտեսական հարցերի հանձնաժողովի նախագահ Բաբկեն Թունյանը նշել է, որ ի սկզբանե նախատեսվում էր ամբողջ մասնագիտական գործունեությունը շրջանառության հարկից տեղափոխել ԱԱՀ դաշտ, սակայն այժմ քննարկումներից հետո որոշում է կայացվել դրանց զգալի մասին ձեռք չտալ: Նրանք շարունակելու են աշխատել այն դաշտում, որտեղ նախկինում աշխատել են, բացառությամբ վերը նշված դեպքերի։