Հայաստանը ներկայացված է Wine Travel Awards ամենամյա մրցանակաբաշխության 3 անվանակարգերում

Արմինֆո. Հայաստանը ներկայացված է գինու զբոսաշրջության միջազգային ամենամյա Wine Travel Awards մրցանակաբաշխության 3 անվանակարգերում: Այդ մասին հաղորդում է Հայաստանի խաղողագործության և գինեգործության հիմնադրամը։

Ըստ աղբյուրի՝ հայ արտադրողները ներկայացված են հետևյալ անվանակարգերում ՝ "Գինու ուղեցույց", "Երկրի այցեքարտ" և "Էնոգաստրոնոմիական միջոցառում":

Նշենք, որ Wine Travel Awards-ը (WTA) գինու զբոսաշրջության ոլորտում նորարարական գլոբալ նախագիծ է՝ նոր և ներառական ձևաչափով։ WTA - ն իրենից ներկայացնում է միասնական գովազդային-տեղեկատվական հիբրիդային արշավ տարբեր երկրներում, որը մտադիր է համաշխարհային ուշադրություն հրավիրել գինու զբոսաշրջության ոլորտում աշխատող թեկնածուների և գործընկերների վրա:

WTA մրցանակի հավակնորդները կարող են լինել գինեգործական ճյուղի ներկայացուցիչներ, այսինքն ՝ գինի և ոգելից խմիչքների արտադրողներ, թանգարաններ և ուղղություններ, ռեստորաններ, գինու երթուղիներ և ասոցիացիաներ, գինու և սննդի փառատոններ, գինու դպրոցներ, գինու դեսպաններ, գինեգործներ, սոմելյեներ, լրագրողներ, ապրանքանիշի դեսպաններ, գինու ուղեցույցներ, մանկավարժներ, բլոգերներ, բովանդակություն ստեղծողներ:

Ընդհանուր առմամբ WTA-ն նախատեսում է 6 անվանակարգ ՝ "Երկրի այցեքարտ", "Դեսպան", "Կրթություն գինու զբոսաշրջության ոլորտում", "Էնոգաստրոնոմիական միջոցառումներ", "Գինու և սննդի ոլորտի ազդեցիկ անձ" և "Գինու ուղեցույց":

Մրցանակի հիմնադիրն է Drinks + մեդիախումբը MIX մարքեթինգային գործակալության հետ համագործակցությամբ։

Նշենք, որ ըստ ՀՀ վիճակագրական կոմիտեի տվյալների, 2024 թվականին Հայաստանում արտադրվել է 10 մլն լիտր գինի, ինչը 29 տոկոսով զիջում է մեկ տարվա վաղեմության ցուցանիշին։