ԿԲ ղեկավար. Վարկերի ընդամենը 0,1 տոկոսն է առնչվում բանկային խարդախությանն ու կիբերհարձակումներին

Արմինֆո. Հայաստանի բանկային համակարգի ընդհանուր վարկային պորտֆելում բանկային խարդախությունների և կիբերհարձակումների հետ կապված փոխառություններին բաժին է ընկնում ընդամենը 0,1%: Այդ մասին մայիսի 6-ին կայացած մամուլի ասուլիսի ժամանակ հայտարարել է ՀՀ Կենտրոնական բանկի նախագահ Մարտին Գալստյանը ՝ լրագրողների խնդրանքով մեկնաբանելով երկրի մի շարք բանկերում բանկային խարդախության հաճախակի դարձած դեպքերի հետ կապված իրավիճակը։

Նա նշել է, որ կարգավորիչը պարտավորվել է առանձին դիտարկել յուրաքանչյուր դեպք՝ պատճառները բացահայտելու և արձագանքելու համար. դրանք կարող են կապված լինել ինչպես պրոդուկտի, կարգավորման, այնպես էլ  քաղաքացիների անուշադրության հետ:

Բանկերի հետ քննարկումների ընթացքում, ինչպես նշել է Գալստյանը, պայմանավորվածություն է ձեռք բերվել համալիր լուծումներ գտնելու վերաբերյալ: Բացի այդ, նա տեղեկացրել է, որ խարդախության հետ կապված վարկային պարտավորություններն այս պահին սառեցված են:

Գալստյանը նշել է, որ նորարարություններից բխող խնդիրները, պարզապես, ճիշտ կարգավորման կարիք ունեն։ Այդ համատեքստում ԿԲ ղեկավարը պարզաբանել է, որ այժմ իրենք փորձում են գտնել "ոսկե միջինը", որպեսզի նորարարությունը չբացառելով, սպառողը պաշտպանված լինի և էական խնդիրներ չունենա։

Նա ափսոսանքով նշել է, որ կարգավորողը չի կարող հետեւել բանկերի թողարկած բոլոր ապրանքներին, քանի որ համապատասխան դեպարտամենտում աշխատում է մոտ 10 մարդ, իսկ ապրանքների քանակը հասնում է 7500-ի: "Խնդիրները հասկանում ենք և փորձում ենք հնարավորինս արագ համակարգային լուծումներ տալ", - ասել է նա, տեղեկացնելով, որ ԿԲ-ն այս պահին հիմնավոր ուսումնասիրություն է իրականացնում 3-4 բանկերում: