ՀԷՑ-ի 2025թ. ներդրումային ծրագիրն ուղղված է առավել մաշված և խոցելի ենթակայանների արդիականացմանը

Արմինֆո. "Հայաստանի էլեկտրական ցանցեր" ՓԲԸ 2025 թվականի ներդրումային ծրագիրն, առաջին հերթին, ուղղված է առավել խոցելի հանգույցների և ենթակայանների արդիականացմանը: Այդ մասին մայիսի 14-ին ՀՀ Ազգային ժողովի ամբիոնից հայտարարել է ՀՀ Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը։

Նրա խոսքով՝ ընկերության գործունեության ևս մեկ ուղղություն է հանդիսանում ավելի մեծ թվով սպառողների մատուցվող ծառայությունների որակական բարելավումը և էլեկտրաէներգիայի բաշխման համար անհրաժեշտ ենթակառուցվածքների ապահովումը:

Ընդհանուր առմամբ, ինչպես նշել է ՀԾԿՀ ղեկավարը, 2024 թվականին էլեկտրական ցանցերը ցանցային տնտեսության բարելավման համար ներդրել են 38,2 մլրդ դրամ, իսկ ընթացիկ տարում այդ թիվը պետք է կազմի 53,9 մլրդ դրամ ։ Այդ միջոցներով նախատեսվում է արդիականացնել մինչև 110 կիլովոլտ լարման 6 ենթակայան, այդ թվում՝ Սպիտակի ենթակայանը։

ՀԾԿՀ ղեկավարը տեղեկացրել է նաեւ, որ "Հայաստանի էլեկտրական ցանցեր" ՓԲԸ-ի գործունեության գնահատման նպատակով Հայաստանի տարբեր մարզեր են ուղարկվել ՀԾԿՀ տեխնիկական խմբեր' ընկերության կողմից իր ներդրումային պարտավորությունների կատարման վերաբերյալ մոնիթորինգ անցկացնելու նպատակով: Այդ խմբերի խնդիրն է ուսումնասիրել ներդրումների արդյունավետությունը տարբեր ցուցանիշներով: Մոնիթորինգի առաջին արդյունքներն ուսումնասիրման փուլում են։ Ներկայումս կարելի է խոսել լարումից շեղումների խնդրի առկայության, սպառողների կողմից անբավարար վիճակում գտնվող էլեկտրական հաշվիչների օգտագործման և այլ հարցերի մասին: