Արմինֆո.«Չեմ կարծում, թե իմ այցը Վրաստան ավելի արդյունավետ կլինի, քան "Գեզի" տերմինալում հայկական բեռների ուշացմանն առնչվող իրավիճակի շուրջ վրացի գործընկերների հետ ամենօրյա շփումները», - նման կարծիք հայտնել է Հայաստանի էկոնոմիկայի նախարար Գեւորգ Պապոյանը ճեպազրույցի ժամանակ՝ պատասխանելով հայ-վրացական սահմանին ավելի քան 40 օր կանգնած հայկական գինու եւ կոնյակի արտաադրանքով բեռնատարների հարցի հնարավոր լուծման մասին լրագրողների հարցին:
Նա նշել է, որ անհրաժեշտության դեպքում, այնուամենայնիվ, հնարավոր է համարում իր այցը Վրաստան, սակայն որևէ մանրամասն չի ներկայացրել բանակցությունների, առկա խնդիրների և լուծման հնարավոր ուղիների մասին:
Նախարարը շտապել է անմիջապես հայտարարել կոնյակ արտադրողներին աջակցության հերթական ծրագրի մասին։ "Չեմ ուզում փակագծեր բացել, բայց Հայաստանի կառավարությունը մեր կոնյակի արդյունաբերության համար աջակցության ծրագիր է մշակում, որը կնպաստի խաղողի անարգել մթերմանը, մեր արտադրողների մրցունակության պահպանմանը", - ասել է նա: Նախարարը պարզաբանել է, որ այդ ծրագրի շահառուները կլինեն արտաահանման համար կոնյակի սպիրտ եւ կոնյակ արտադրողները, որոնք պատշաճ կերպով կիրականացնեն խաղողի անարգել մթերումը, ինչի դիմաց պետության կողմից որոշակի աջակցություն կստանան:
"Ավելին ասել չեմ կարող, քանի որ աջակցության տեսակի եւ մեխանիզմների մասին դեռ քննարկումներ պետք է տեղի ունենան ոլորտի ներկայացուցիչների հետ", - ընդգծել է Պապոյանը: Հիշեցնենք, որ Վրաստանում գտնվող "Գեզի" տերմինալում ավելի քան մեկ ամիս կանգնած են հայկական գինով և կոնյակով բեռնված մեքենաներ, որոնք ուղևորվում էին դեպի Ռուսաստան և Բելառուս: Վրաստանը մեքենաները կանգնեցրել է լաբորատոր փորձաքննություն անցկացնելու նպատակով, ինչը, ըստ հայ արտահանողների, տարանցիկ երկրի իրավասությունը չէ: Տարակուսանքի մեջ գտնվելով՝ հայ արտադրողները ակցիաներ են անցկացնում, փակում ճանապարհներ՝ պաշտոնական Թբիլիսիի նման գործողությունների վերաբերյալ պարզաբանումներ ստանալու և գործարարների համար ստեղծված ճգնաժամային իրավիճակի լուծումը քննարկելու համար:
Մասնավորապես, օրեր առաջ Հայաստանում Վրաստանի դեսպանատան մոտ տեղի ունեցած ակցիայի արդյունքում դիվանագիտական ներկայացուցչության ղեկավար Գիորգի Շարվաշիձեն համաձայնել էր ընդունել արտահանողների ներկայացուցիչներին: Հանդիպման արդյունքում նա հավաստիացրել էր, որ սեղմ ժամկետներում պաշտոնական Թբիլիսին իր պարզաբանումները կտա ստեղծված իրավիճակի վերաբերյալ: Այդպես էլ եղավ։ Մի շարք վրացական ԶԼՄ-ներում հրապարակված Վրաստանի եկամուտների ծառայության հայտարարությունում ասվում էր այն մասին, որ սահմանին տեղի ունեցողը ոչ այլ ինչ է, քան հսկիչ ընթացակարգեր մաքսակետերում, որոնք իրականացվում են ստանդարտ կարգով, իսկ բեռնատարների կուտակումներ չեն նկատվում:
Այդ հայտարարությանը հաջորդել էր հերթական բողոքի ակցիան Վրաստանի դեսպանատան մոտ, որը պսակվել էր Վրաստանի հյուպատոսի և դեսպանատան մի շարք աշխատակիցների հետ հանդիպմամբ: Քննարկումների արդյունքում "Շահնազարյան" կոնյակի գործարանի ղեկավար Հայկ Շահնազարյանը լրատվամիջոցների ներկայացուցիչներին եւ տուժած ձեռնարկությունների հավաքված աշխատակիցներին հաղորդել էր, որ դիվանագիտական ներկայացուցչությունում իրենց խորհուրդ են տվել դատի տալ վրացական կողմին՝ տեղի ունեցածի կապակցությամբ:
Սուրեն Պարսյանը "լավատեսական" է համարել Հայաստանի ՀՆԱ-ի աճի վերաբերյալ ՀԲ-ի եւ ԱՄՀ-ի վերանայված կանխատեսումը՝ դեպի նվազում
Եկամուտների համընդհանուր հայտարարագրում. այն, ինչ ստացվեց, ընդհանուր քիչ բան ունի մտածվածի հետ․Դավիթ Անանյան
Հարկային և հանրային ծառայությունների վճարների բարձրացում. տեղին, թե անտեղի են փոթորկվել քաղաքացիները.
ՉԺՀ-ը պատրաստվում է "Մեկ գոտի, մեկ ճանապարհ" նախաձեռնության նոր գլուխ բացել՝ դրանում Հայաստանի ներգրավմամբ. չինացի դիվանագետ
Ավարտվել է «Արդշինբանկ» ՓԲԸ և «Արդշինինվեստբանկ» ՓԲԸ միացման գործընթացը
Տարեսկզբից ի վեր Երեւանում ձեռք բերված հասարակական տրանսպորտի տոմսերի ընդհանուր ծավալում փաթեթայիններին բաժին է ընկել ընդամենը 1,2%
Թրամփի առանձնատանը կայացել են Նարեկ Մկրտչյանի հանդիպումները մի շարք ամերիկացի գործիչների հետ