Հրազդանի ցեմենտի գործարանը կրկնակի սնանկության գործընթաց է անցնում

Արմինֆո.  Հրազդանի ցեմենտի գործարանում իրավիճակը գտնվում է ՀՀ կառավարության վերահսկողության ներքո։ Այդ մասին մայիսի 27-ին ԱԺ ամբիոնից հայտարարել է էկոնոմիկայի փոխնախարար Էդգար Զաքարյանը՝ պատասխանելով ԱԺ "Քաղաքացիական պայմանագիր" խմբակցության պատգամավոր Արսեն Թորոսյանի հարցին։

Պատգամավորը, մասնավորապես, նշել է, որ ձեռնարկությունն արդեն երկրորդ անգամ է հայտնվում սնանկության գործընթացում։ Մինչդեռ, ինչպես շարունակել է Թորոսյանը, ցեմենտը երկրի համար ռազմավարական հումք է, որը որոշում է շինարարական աշխատանքների ծավալները։ Նա փոխնախարարից հետաքրքրվեց, թե ինչ քայլեր են ձեռնարկվում Հրազդանի ցեմենտի գործարանը փրկելու համար։

Ի պատասխան՝ Զաքարյանն ընդգծել է, որ վերոնշյալ խնդրի շուրջ մի քանի հանդիպումներ և խորհրդակցություններ են անցկացվել: Գործարանի սեփականատիրոջ հետ մշակվում է "ճանապարհային քարտեզ"՝ ձեռնարկությունը ճգնաժամից դուրս բերելու համար, որը, հիմնականում, պայմանավորված է որոշ ֆինանսական խնդիրների առաջացմամբ։

Թորոսյանն այդ առնչությամբ բարձրացրել է բաժնետոմսերի մի մասի ընդունման միջոցով գործարանի առողջացման գործընթացին պետության մասնակցության հնարավորության հարցը։ "Չի կարելի գործընթացն ինքնահոսի թողնել։ Պետությունը պետք է մասնակցի խոշոր ձեռնարկությունների, այդ թվում ՝ Հրազդանի ցեմենտի գործարանի կառավարմանը, որպեսզի մի օր լուրջ մարտահրավերների չբախվի", - ասել է խորհրդարանականը։

Ի պատասխան՝ Զաքարյանը վստահեցրել է, որ քննարկումների ընթացքում այդ հարցը ևս կբարձրացվի, և, անհրաժեշտության դեպքում, պետությունը ևս կդառնա գործարանի բաժնետերերից մեկը:

Շարունակելով թեման՝ ԱԺ կառավարող խմբակցության պատգամավոր Լիլիթ Ստեփանյանը նշել է, որ արդեն մեկ տարուց ավելի ձեռնարկության շուրջ 400 աշխատակիցներ աշխատավարձ չեն ստանում: Նրա ասելով՝ գործարանի ղեկավարությունը, վկայակոչելով առկա պարտքերը, աշխատում է խափանումներով՝ չնայած հումքի եւ պատրաստի արտադրանքի առկայությանը։ Ստեփանյանը սեփականատերերին մեղադրել է անգործության համար՝ ձեռնարկությունն ամբողջ հզորությամբ գործարկելու հարցում։

ԱԺ ընդդիմադիր "Հայաստան" խմբակցության պատգամավոր Արթուր Խաչատրյանն էլ նշել է, որ արդեն երկար ժամանակ գործարանը գտնվում է հարկադիր պարապուրդի մեջ, որը պայմանավորված է սնանկության գործընթացով:

Այդ առնչությամբ փոխնախարարը ևս մեկ անգամ վստահեցրել է, որ հարցը քննարկումների փուլում է: Նա նշել է, որ այդ հարցով քրեական գործ է հարուցվել, սակայն հրաժարվել է մանրամասներ ներկայացնել,  պատճառաբանելով, որ անհրաժեշտ տեղեկատվություն չկա: Այդուհանդերձ, Էդգար Զաքարյանի հավաստմամբ, կառավարությունն աշխատում է, գոնե, աշխատողների աշխատավարձերի հարցը լուծելու ուղղությամբ:

Նշենք, որ Հայաստանում ցեմենտի արտադրությամբ զբաղվում են Հրազդանի և Արարատի ցեմենտի գործարանները։ "Հրազդան ցեմենտ" գործարանն անցել է սեփականատերերի փոփոխության մի քանի փուլ։ 2001 թվականին այն սեփականաշնորհվել է «Միկա Արմենիա» ընկերության նախագահ Միխայիլ Բաղդասարովի կողմից և վերանվանվել "Միկա - Ցեմենտ" ՓԲԸ:  2016 թվականին կուտակված պարտքերի պատճառով ձեռնարկությունը փոխանցվել է ՎՏԲ-Հայաստան բանկին, որը դարձել է դրա լիիրավ սեփականատերը: 2017 թվականի վերջին գործարանը ձեռք է բերել" Ջի Էմ հոլդինգ "- ի կողմից հիմնադրված "Հրազդան ցեմենտ Քորփորեյշն" ընկերությունը, որն, իր հերթին, պատկանում է երկու գործարարների՝ Վիտալի Գրիգորյանցին (55%) և Արսեն Միքայելյանին (45%): Վիտալի Գրիգորյանցը՝ ռուս-ուկրաինական գործարար է, «Ամիո բանկ» վերանվանված "Հայբիզնեսբանկ" ՓԲԸ-ի հիմնական բաժնետերն էր (95%): Արսեն Միքայելյանը նույն բանկի վարչության նախագահն է և "Վիտալի Գրիգորյանց"բարեգործական հիմնադրամի տնօրենը: Այսպիսով, 80,010,000 ՀՀ դրամ կանոնադրական կապիտալով "Հրազդան ցեմենտ Քորփորեյշն" ընկերությունը Գրիգորյանցի և Միքայելյանի կողմից վերահսկվող ֆինանսական և արդյունաբերական ակտիվների հետ կապված բիզնես խմբի մաս է կազմում: "Հրազդան Ցեմենտ Քորփորեյշն" ՍՊԸ սնանկացման գործընթաց սկսելու մասին դատական որոշումը կայացվել է 2022թ. մայիսի 4-ին: