Արմինֆո.ԱՄՆ-ը Հայկական ատոմային էլեկտրակայանին 3,4 մլն դոլար արժողությամբ վարժասարք է տրամադրել։ Հանձնման արարողությունը տեղի է ունեցել հունիսի 3-ին:
«Ուրախ էի մասնակցել 3,4 միլիոն դոլար արժողությամբ գերժամանակակից վարժասարքի գործարկման միջոցառմանը, որը կօգնի ՀԱԷԿ-ի անվտանգ շահագործումն ապահովելու հարցում։ ԱՄՆ էներգետիկայի դեպարտամենտի և ՀԱԷԿ-ի համագործակցության արդյունքում նորագույն ամերիկյան տեխնոլոգիաների ականատեսն ենք դառնում, ինչը միջուկային էներգիայի ոլորտում Հայաստանի հետ Միացյալ Նահանգների ավելի քան 25 տարվա համագործակցության հերթական ձեռքբերումներից է», - արարողության ժամանակ ասել է Հայաստանում ԱՄՆ դեսպան Քրիստինա Քվինը:
Նշենք, որ 1995 թվականին Հայկական ԱԷԿ-ը կրկին շահագործման հանձնելուց հետո ԱՄՆ-ը Հայաստանին տեխնիկական աջակցություն է ցուցաբերել և շարունակում է ցուցաբերել կայանի անվտանգության բարձրացման գործում:
Հիշեցնենք նաև, որ մայիսի 15-ից Հայկական ԱԷԿ-ը պլանային նախազգուշական վերանորոգման է կանգնեցվել՝ 60 օր ժամկետով։
