Փաշինյանը պատմել է, թե որն է երջանկության գինը

Արմինֆո.  Վարչապետ Նիկոլ Փաշինյանը հունիսի 4-ին խորհրդարանում 2024 թվականի պետական բյուջեի կատարողականի քննարկման ժամանակ կոչ է արել ապագայում հիմնական ֆինանսական փաստաթուղթը մշակել այնպես, որ այն անվանվի "երջանկության բյուջե":

Ինչպես կարծում է վարչապետը, Հայաստանում անհրաժեշտ է քաղաքացիների շրջանում ձևավորել այն ըմբռնումը, որ հարկերն անհրաժեշտ են իրենց ընտանիքի, երեխաների, տան, ունեցվածքի և երկրի անվտանգության, բարեկեցության և երջանկության համար:

«Մենք պետք է հասկանանք, թե ինչ է մեզ պետք երջանիկ լինելու համար, որքան պետք է վճարենք այդ երջանկության համար, և ինչպես ենք բաշխում այդ երջանկության համար անհրաժեշտ միջոցները:

Հայաստանում ոչինչ տեղի չի ունենում առանց պետական բյուջեի ծախսման», - ասել է Փաշինյանը։ Նա հերթական անգամ նշել է, որ հանրապետությունում ոչ մի քաղաքացի, ոչ մի ընտանիք ավելի շատ չի ծախսում ընտանիքի անդամների բարեկեցության վրա, որքան ծախսում է պետությունը:

Ուրեմն, նրա կարծիքով, երջանիկ լինելու համար պետք է ունենալ պաշտպանվածության զգացողություն։ Նա նշել է, որ պաշտպանված լինել նշանակում է ունենալ ուժեղ ոստիկանություն, դատական համակարգ, բանակ, "արդյունավետ" Ազգային անվտանգության ծառայություն եւ դիվանագիտություն, որոնց վրա կարելի է հույս դնել։

«Իսկ երջանիկ լինելու համար մարդը պետք է լինի առողջ», - հավելել է նա: Այդ համատեքստում նա ընդգծել է Համընդհանուր բժշկական ապահովագրության ներդրման կարևորությունը (որը մեկ տարի հետաձգվում է-խմբ.):

Մարդկային երջանկության հասնելու համար կարևոր է լինել ստեղծագործող անհատ, որը հնարավոր չէ առանց համապատասխան կրթության: Կարևոր է նաև ունենալ «սոցիալական միջավայր»՝ ապրել զբոսայգիների, հանգստի վայրերի մոտ, ունենալ առողջ սնունդ, վարել առողջ ապրելակերպ:

Երջանիկ լինելու համար, ինչպես շարունակել է Փաշինյանը, պետք է ճանապարհորդել։ Իսկ դրա համար պետք է ձևավորել համապատասխան ենթակառուցվածքներ։ Այդ առումով նա հայտարարել է, որ այսօրվա Հայաստանում կարելի է էժան ճանապարհորդել, քանի որ լոուքոսթերների առկայության պատճառով կարելի է ավիատոմսեր գնել 30-40 եվրոյով։ «Արդյո՞ք նման հնարավորություն կար 2016 թվին» ,- հարցրել է նա:

Փաշինյանի խոսքով՝ Հայաստանում տարբեր տարիների տարբեր կերպ են անվանել պետական բյուջեն. "համախմբման", "ճգնաժամային" եւ այլն: «Իսկ հիմա մենք պետք է ունենանք բյուջե երջանկության համար, այսինքն, մտածենք, թե ինչի կարիք ունեն քաղաքացիները երջանկության հասնելու համար", - նշել է կառավարության ղեկավարը:

Ողջ վերը նշվածն ապահովելու համար Նիկոլ Փաշինյանը կարևորել է հարկերի վճարման պարտավորության նկատմամբ վերաբերմունքի փոփոխությունը: «Կլինեն հարկեր, հարկերը կվճարեք, այդ ամենը կլինի, այլապես, ոչինչ չի լինի», - ամփոփել է ՀՀ վարչապետը:

Այսպիսով, ՀՀ վարչապետ Նիկոլ Փաշինյանը 2024 թվականի պետական բյուջեի կատարման մասին հաշվետվության խորհրդարանական քննարկումները բացել է հղում անելով ոչ թե թվերին, այլ, հերթական անգամ՝ քաղաքացիների հույզերին: