ԵՄ-ը թարմացրել է ավիացիոն "սև ցուցակը"։ Եվրոպական երկինքն անհասանելի է մնում հայկական ավիաընկերությունների համար

Արմինֆո.ԵՄ-ը թարմացրել է ավիացիոն "սև ցուցակը"։ Եվրոպական երկինքը փակ է մնում հայկական ավիաընկերությունների համար՝ Աֆղանստանի, Տանզանիայի, Սուրինամի ավիափոխադրողների հետ միասին, հաղորդում է AeroTime-ը:

Աղբյուրի համաձայն, 2025 թվականի հունիսի 3-ին Եվրահանձնաժողովը (ԵՀ) թարմացրել է ԵՄ ավիացիոն "սև ցուցակը" ՝ որոշ երկրների ավիաընկերություններին արգելելով թռիչքներ իրականացնել դեպի Եվրամիության երկրներ՝ անվտանգության նկատառումներից ելնելով:

Նշվում է, որ "սև ցուցակի" վերջին թարմացումը հիմնված է Եվրոպական միության (ԵՄ) անդամ պետությունների թռիչքների անվտանգության փորձագետների միաձայն կարծիքի վրա, որոնք հանդիպել են Բրյուսելում 2025 թվականի մայիսի 13-15-ը ՝ ԵՄ թռիչքների անվտանգության կոմիտեի հովանու ներքո:

Վերջին թարմացումից հետո, ընդհանուր առմամբ, 169 ավիաընկերություն այժմ արգելված է ԵՄ երկնքում: Այն ներառում է 142 ավիաընկերություն, որոնք գրանցված են 17 պետություններում, այդ թվում ՝ Աֆղանստանում, Անգոլայում (բացառությամբ 2 ավիաընկերության), Հայաստանում, Կոնգոյում (Բրազավիլ), Կոնգոյի Դեմոկրատական Հանրապետությունում, Ջիբութիում, Հասարակածային Գվինեայում, Էրիթրեայում, Ղրղզստանում, Լիբերիայում, Լիբիայում, Նեպալում, Սան Տոմե և Պրինսիպիում, Սիերա Լեոնեում, Սուդանում, Սուրինամում և Տանզանիայում:

"Սև ցուցակում երկրների ներկայության պաշտոնական պատճառը այդ պետությունների ավիացիոն իշխանությունների կողմից թռիչքների անվտանգության ոչ բավարար վերահսկողությունն է", - ասվում է ԵՀ-ի հայտարարության մեջ:

Բացի այդ, վերջին ցուցակում ներառվել է 22 ավիաընկերություն, որոնք հավաստագրված են Ռուսաստանում, ինչպես նաև հինգ առանձին ավիաընկերություններ այլ երկրներից ՝ անվտանգության լուրջ թերությունների հիման վրա. Air Zimbabwe - ը Զիմբաբվեից, Avior Airlines-ը Վենեսուելայից, Iran Aseman Airlines-ը Իրանից, ինչպես նաև Fly Baghdad-ը և Iraqi Airways-ը (երկուսն էլ Իրաքից): Եվս երկու ավիաընկերություններ ենթակա են շահաագործման սահմանափակումների և կարող են թռչել ԵՄ միայն որոշակի տեսակի ինքնաթիռներով:

 "Ուղևորների անվտանգությունը շարունակում է մնալ մեր գլխավոր առաջնահերթությունը", - ասել է կայուն տրանսպորտի և զբոսաշրջության հարցերով ԵՄ հանձնակատար Ապոստոլոս Ցիցիկոստասը:

Հիշեցնենք, որ 2020 թվականին Եվրահանձնաժողովը թարմացրել էր ավիացիոն անվտանգություն ցուցակը, որի համաձայն, Հայաստանում հավաստագրված ավիաընկերություններն իրավունք չունեն թռիչքներ իրականացնել դեպի Եվրամիության երկրներ, բացառությամբ՝ տարհանման և հումանիտար չվերթները, ինչպես նաև բժշկական նպատակներով իրականացվող չվերթները: Որոշումը կայացվել է Հայաստանի քաղավիացիայի կոմիտեի և հայկական վեց ավիաընկերությունների հետ լսումներից հետո: Չնայած դրան ՝ 2021 թվականի նոյեմբերի 15-ին Հայաստանը ԵՄ-ի հետ ստորագրել է ընդհանուր ավիացիոն համաձայնագիր։ Ըստ փաստաթղթի՝ հայկական և եվրոպական ավիաընկերությունները կկարողանան ազատ թռչել, եթե Հայաստանը շարունակի բարեփոխումները ավիացիոն անվտանգության, օդային տրանսպորտի կառավարման, շրջակա միջավայրի պաշտպանության և այլ առանցքային ոլորտներում:

Ս. թ. մարտին ոլորտի պատասխանատուները հայտարարել էին, որ Հայաստանն ամբողջությամբ կատարել է Եվրոպական միության ավիացիոն "սև ցուցակից" դուրս գալու գործողությունների ծրագրի շրջանակներում նախատեսված իր բոլոր պարտավորությունները: Ինչպես հայտարարել էր  ՀՀ տարածքային կառավարման և ենթակառուցվածքների նախարարի տեղակալ Քրիստինե Ղալեչյանը, բոլոր 41 միջոցառումներն ամբողջությամբ իրականացվել են։ Փոխնախարարը նշել էր, որ կատարված աշխատանքն ամփոփված է, դրա արդյունքներն ուղարկվել են ԵՄ, որտեղից հայկական կողմն ակնկալում է դրական արձագանք: