Հայաստանից պտուղ-բանջարեղենի արտահանումը 2024թ. գերազանցել է 144 հազար տոննան

Արմինֆո.  2024 թվականին Հայաստանից արտահանվել է 144 540 տոննա թարմ պտուղ-բանջարեղեն, ինչը 8.4% - ով գերազանցում է 2023 թվականի ցուցանիշը։ Այդ մասին, խորհրդարանում պատասխանելով պատգամավորների հարցերին, հաղորդել է Հայաստանի էկոնոմիկայի փոխնախարար Արման Խոջոյանը, ով համակարգում է գյուղատնտեսության ոլորտը։

Ընդ որում, նա նշել է ծաղիկների արտահանման 6.6 անգամ աննախադեպ աճ՝ մինչեւ 565 տոննա, ինչը, նրա խոսքով, պայմանավորված է այն հանգամանքով, որ շատ ջերմոցային տնտեսություններ անցել են ծաղիկների աճեցմանն ու արտահանմանը:

Հարցին, թե ինչպես է կարտոֆիլին առնչվող իրավիճակը, հաշվի առնելով Գեղարքունիքի մարզի արտադրողների բողոքները, որ կարտոֆիլը չի իրացվում, Խոջոյանը հաղորել է, որ 2024 թվականին արտադրվել է, ընդհանուր առմամբ, 337 հազար տոննա կարտոֆիլ, որից 14 հազար տոննան արտահանվել է: Միաժամանակ նա ուշադրություն է հրավիրել այն հանգամանքի վրա, որ 2023թ. Հայաստանից արտահանվել է ընդամենը 1.3 հազար տոննա կարտոֆիլ։ 2025 թվականի ընթացիկ ժամանակահատվածի դրությամբ կարտոֆիլի արտահանման ծավալը կազմել է արդեն 4 հազար տոննա։

Անդրադառնալով ագրոարդյունաբերական արտադրանքի արտահանմանը՝ փոխնախարարը տեղեկացրել է, որ արտադրության գրեթե բոլոր կատեգորիաներում աճ է գրանցվել ՝ բացառությամբ չրերի ։ Ագրոարդյունաբերական համալիրի արտադրանքի արտահանման համախառն աճը, նրա խոսքով, կազմել է 14 տոկոս ։ Չրերի վերաբերյալ Խոջոյանը նշել է, որ արտահանման մատակարարումները նվազել են 27 տոկոսով ։ Սակայն արժեքային արտահայտությամբ արձանագրվել է 60 տոկոս աճ, ինչը, նրա խոսքով, խոսում է այն մասին, որ Հայաստանն արտահանել է պրեմիում կարգի չրեր։ Նվազում է գրանցվել նաև կոնյակի սպիրտի մատակարարման գծով՝ 96% - ով, ընդ որում, շշալցված կոնյակի արտահանումը քանակական արտահայտությամբ, ընդհակառակը, աճել է 6% - ով։ Նշենք, որ Խոջոյանը չի ներկայացրել մատակարարումների ծավալը։