ՇԿՀԱ փորձագետները ծանոթացել են Հայկական ԱԷԿ-ի արտադրական գործընթացներին

Արմինֆո. 2025 թվականի հունիսի 8-ից 11-ն ընկած ժամանակահատվածում Հայկական ատոմային էլեկտրակայանում (ՀԱԷԿ) կայացել է Կորպորատիվ գործընկերային ստուգման նախնական այց՝ Շահագործող կազմակերպությունների համաշխարհային ասոցիացիայի (ՇԿՀԱ) փորձագետների մասնակցությամբ։

ՀԱԷԿ-ի մամուլի ծառայության հաղորդագրության համաձայն, այցի շրջանակներում ՇԿՀԱ փորձագետները ծանոթացել են կայանի արտադրական գործընթացներին, իրականացրել մի շարք տեխնիկական շրջայցեր, ինչպես նաև անցկացրել են հարցազրույցներ ղեկավար կազմի և մասնագիտական անձնակազմի ներկայացուցիչների հետ։ Նմանատիպ հանդիպումներն ու քննարկումները հնարավորություն են տվել ՇԿՀԱ թիմին նախնական պատկերացում կազմել ՀԱԷԿ-ի կառավարման համակարգի, անվտանգության մշակույթի և գործառնական մոտեցումների վերաբերյալ։

Այցի ընթացքում մասնագետները կատարել են դիտարկումներ, որոնք հետագայում կծառայեն որպես հիմք հիմնական գործընկերային ստուգման պատրաստման համար։ Նախնական այցն ունի կարևոր նշանակություն՝ որպես ՀԱԷԿ-ի և ՇԿՀԱ-ի միջև համագործակցության հերթական փուլ։

«Հայկական ԱԷԿ-ը բարձր է գնահատում նմանօրինակ համագործակցությունները, որոնք խթանում են անվտանգության մշակույթի խորացումը, կազմակերպական արդյունավետության բարձրացումը և շահագործման գերազանցության ապահովումը՝ համաձայն միջազգային լավագույն փորձի», - ասվում է հաղորդագրությունում։