Արմինֆո. Տրանսպորտային հաղորդակցությունների ապաշրջափակման համատեքստում արտապատվիրակումը նախատեսում է, օրինակ, ինչ-որ ընկերության ստեղծում, որը կներգրավի ներդրումներ, որովհետև "Խաղաղության խաչմերուկ" նախագիծն ունի հսկայական ներդրումային ներուժ և հետաքրքրություն, բայց մենք պետք է կարողանանք կոնսոլիդացնել այդ ներդրումները: Հուլիսի 16-ին մամուլի ասուլիսի ժամանակ այդ մասին հայտարարել է ՀՀ վարչապետ Նիկոլ Փաշինյանը։
"Մենք շատ ենք խոսում ավտոմոբիլային ճանապարհների և երկաթուղային գծերի մասին, բայց ուզում եմ ուշադրություն հրավիրել այն հանգամանքի վրա, որ այդ համատեքստում խոսքը և խողովակաշարերի, և էլեկտրահաղորդման գծերի, և հեռահաղորդակցության մալուխների մասին է, և սա տնտեսություն է, որը պետք է ստեղծվի և կառավարվի", - ասել է կառավարության ղեկավարը:
Ընդ որում, նա նշել է, որ Հայաստանում բազմաթիվ են արտապատվիրակման դեպքերը, որոնցից որոշ մասով կա և գոհունակություն, և դժգոհություն։ Այդ առնչությամբ վարչապետը հիշատակել է "Զվարթնոց" օդանավակայանի, Հարավկովկասյան երկաթուղու, ջրային օպերատորի օրինակները։ "Եվ չեմ կարծում, որ այստեղ ինչ-որ կերպ խախտվել է Հայաստանի ինքնիշխանությունը։ Բոլոր այդ ձեռնարկությունները շարունակում են մնալ Հայաստանի Հանրապետության սեփականությունը", - ընդգծել է նա։
Փաշինյանը նշել է, որ այսօր շատ է խոսվում նաև վարձակալության մասին, այդ թվում՝ հողի։ Այդ առնչությամբ նա ուշադրություն է հրավիրել, որ ՀՀ օրենսդրության համաձայն, խոսքը կառուցապատման իրավունքի մասին է։ Եվ կառուցապատման տրամաբանությամբ, ինչպես նա պարզաբանել է, պայմանագրի ժամկետի ավարտից հետո ներդրումները դառնում են Հայաստանի Հանրապետության սեփականությունը ։ "Ինչու հիմա չեմ կարող կոնկրետացնել, որովհետև հիմա տարբեր գաղափարներ են քննարկվում։ Եթե պայմանավորվածություն ձեռք բերված լիներ, կամ ստորագրված լիններ, կարող էի մանրամասներ հայտնել", - ասել է Փաշինյանը։
Հիշեցնենք, որ օրեր առաջ ՀՀ վարչապետի մամուլի քարտուղար Նազելի Բաղդասարյանն անդրադառնալով Թուրքիայում ԱՄՆ դեսպանի հայտարարություններին՝ Հայաստանի Հանրապետության ինքնիշխան տարածքի մի մասը ԱՄՆ-ի կողմից վարձակալելու հնարավորության մասին, որով, ըստ դեսպանի, իրականացվելու է "Զանգեզուրի միջանցքը", նշել էր, որ Հայաստանի Հանրապետությունը չի քննարկել և չի քննարկում իր ինքնիշխան տարածքի կառավարումը երրորդ կողմին հանձնելու հարց:
Ճշգրտող հարցին, թե արդյոք հնարավոր է, որ ԱՄՆ դեսպանը նկատի է ունեցել ճանապարհի կառավարումը հանձնումը արտապատվիրակմամբ, Բաղդասարյանը նշել էր, որ Հայաստանի Հանրապետությունը չի քննարկել և չի քննարկում իր ինքնիշխան տարածքի կառավարումը երրորդ կողմին հանձնելը: "Հայաստանի Հանրապետության տարածքի ոչ մի հատված չի կարող գտնվել Հայաստանի Հանրապետության տարածքային ամբողջականությունից, ինքնիշխանությունից կամ իրավասությունից դուրս", - եզրափակել էր նա:
Ավելի վաղ Թուրքիայում ԱՄՆ դեսպանը հայտարարել էր Սյունիքով անցնող ճանապարհը 100 տարով վարձակալելու հնարավորության մասին ՝ Երևանի և Բաքվի միջև վեճը լուծելու համար:
