Հայաստանի Միջուկային անվտանգության կարգավորման կոմիտեն նոր շենք կունենա

Արմինֆո.  Հայաստանի Միջուկային անվտանգության կարգավորման կոմիտեն նոր շենք կունենա։ ՀՀ կառավարությունն օգոստոսի 7-ի նիստում հավանություն է տվել որոշման նախագծին, համաձայն որի, շենքի կառուցման նախագծանախահաշվային փաստաթղթերի մշակման համար 25,3 մլն դրամի  բյուջետային միջոցներ կտրամադրվեն:

Ինչպես նշվում է նախագծի հիմնավորման մեջ, ՀՀ կառավարության 2024 թվականի հուլիսի 25-ի «Անշարժ գույք հետ վերցնելու և ամրացնելու մասին» № 1135-Ա որոշմամբ ՀՀ միջուկային անվտանգության կարգավորման կոմիտեին  ամրացվել է Երևան, Աջափնյակ, Ալիխանյան եղբայրների փողոց թիվ 2 հասցեում գտնվող՝ 516,2 քառ. մետր ընդհանուր մակերեսով արհեստանոցը, 102,3 քառ. մետր ընդհանուր մակերեսով օժանդակ շինությունը և դրանց զբաղեցրած, օգտագործման ու սպասարկման համար անհրաժեշտ ընդհանուր բաժնային սեփականություն հանդիսացող՝ 0,55701 հա հողամասը՝ ռադիոքիմիական ռեֆերենսային լաբորատորիայի ստեղծման, ինչպես նաև կոմիտեի և «Միջուկային և ռադիացիոն անվտանգության գիտատեխնիկական կենտրոն» փակ բաժնետիրական ընկերության աշխատողների համար  վարչական շենքի կառուցման նպատակով։

Որոշման  ընդունումը բխում է նաև ՀՀ և Եվրոպական հանձնաժողովի միջև ստորագրված «Հայաստանում միջուկային անվտանգության, ճառագայթային պաշտպանության և ռադիոակտիվ թափոնների կառավարման ենթակառուցվածքների ամրապնդում» ֆինանսավորման համաձայնագրից՝ (արժեքը կազմում է շուրջ  12,900,000 եվրո), հաստատվել է ՀՀ նախագահի 2024թ․ դեկտեմբերի 27-ի ՆՀ-405-Ն հրամանագրով։

ՀՀ 2025 թվականի պետական բյուջեում վերը նշված տարածքում շենքի կառուցման համար նախագծանախահաշվային փաստաթղթերի մշակման աշխատանքների համար ֆինանսավորում չի նախատեսվել։ Շենքի կառուցման համար անհրաժեշտ նախագծանախահաշվային փաստաթղթերի ձեռքբերման և տեղական վճարների համար ներկայումս անհրաժեշտություն է առաջացել ՀՀ քաղաքաշինության կոմիտեին  հատկացնել  25300,0 հազ.դրամ գումար` 20300,0 հազ.դրամը համաձայն ՀՀ քաղաքաշինության կոմիտեի կողմից տրամադրված շենքի կառուցման աշխատանքների խոշորացված ծախսերի հաշվարկի (տեղեկանքը կցված է), որից 19000,0 հազ. դրամ նախագծանախահաշվային փաստաթղթերի ձեռքբերման համար, 1300,0  հազ․ դրամ փորձաքննության ծառայությունների։

Եվրոպական միությունը պատրաստակամություն է հայտնել աջակցելու Հայաստանում ճառագայթային լաբորատորիայի ստեղծմանն ու գործարկմանը` տրամադրելով ժամանակակից սերտիֆիկացված սարքեր, սարքավորումներ, նմուշառման, անհատական պաշտպանության միջոցներ, հրահանգներ, իրականացնել անձնակազմի պատրաստում և վերապատրաստում՝ պայմանով, որ ժամանակին տրամադրվի կամ կառուցվի համապատասխան շենք։

Մինչև 2040 թվականը Հայաստանի Հանրապետության էներգետիկ հատվածի զարգացման ռազմավարական ծրագրով նախատեսվում է միջոցներ ձեռնարկել ՀԱԷԿ-ի 2-րդ էներգաբլոկի շահագործման ժամկետի ավարտից հետո ԱԷԿ-ի նոր էներգաբլոկը շահագործման հանձնելու ուղղությամբ: Նման միջոցառման իրականացման համար անհրաժեշտ է լինելու կոմիտեն և կոմիտեին գիտատեխնիկական աջակցություն ցուցաբերող կազմակերպությունը համալրել նոր կադրերով, ինչպես նաև իրականացնել նոր մասնագետների վերապատրաստում: Կենտրոնն ակտիվ մասնակցություն է ունենալու ստեղծվելիք ռադիոքիմիական ռեֆերենսային լաբորատորիայի շահագործման աշխատանքներում և իր պատրաստակամությունն է հայտնում ֆինանսական ներդրում ունենալ կառուցվելիք շենքի շինարարական աշխատանքներում։ Միանվագ վճարում կատարելու դեպքում կենտրոնի նման փոքր կազմակերպության համար կարող է ստեղծվել ֆինանսական ծանր վիճակ, ուստի առաջարկում ենք շենքի կառուցման նախագծային և շինարարական աշխատանքներում կենտրոնի մասնակցության վերաբերյալ առաջարկը քննարկելիս դիտարկել դրա դիմաց տարաժամկետման տարբերակը՝ հինգ տարի։ Ենթադրվում է, որ կենտրոնի ներդրմամբ կառուցված տարածքը կենտրոնին կտրամադրվի սեփականության իրավունքով։

Ներկայումս ՀՀ միջուկային անվտանգության կարգավորման կոմիտեն 43 հաստիքով զբաղեցնում է Երևան քաղաքի Տիգրան Մեծի 4 հասցեում գտնվող շենքի 5-րդ և 6-րդ հարկերը, ընդհանուր 738քմ․ տարածքով մակերես։

Նոր միջուկային բլոկի կառուցման, ինչպես նաև գործող ատոմային էլեկտրակայանը շահագործումից հանելու գործընթացների շրջանակում ՀՀ-ի կողմից վավերացված ատոմային էներգիայի բնագավառի միջազգային մի շարք կոնվենցիաների և ՀՀ օրենսդրությամբ կոմիտեին վերապահված գործառույթների կատարումն ապահովելու համար անհրաժեշտություն է առաջանալու կոմիտեն համալրել ևս 30-40 նոր մասնագետներով։