Արմինֆո. «Ռոսսելխոզնադզոր»-ը հաղորդել է, որ օգոստոսի 22-24-ը Հայաստանից Ռուսաստան է ներկրվել կարանտինային հսկողության ենթական արտադրանքով 146 տրանսպորտային միջոց, 21-ը՝ վերադարձվել է: Այս տեղեկատվությունը հակասում է ՀՀ էկոնոմիկայի նախարար Գևորգ Պապոյանի պնդումներին։
«Ռոսսելխոզնադզոր»-ի մամուլի ծառայությունում հայտարարել են, որ մուտքի մերժման պատճառը կարանտինային հսկողության ենթակա արտադրանքի մատակարարման ժամանակ Ռուսաստանի բուսասանիտարական պահանջներին չհամապատասխանելն է:
Անցած շաբաթվա վերջին ԱԺ ընդդիմադիր "Հայաստան" խմբակցության պատգամավոր Գառնիկ Դանիելյանը Facebook - ի իր էջում հաղորդել էր, որ դեպի Ռուսաստան մեկնող հարյուրավոր հայկական բեռնատարներ հետ են վերադարձել Վերին Լարսի սահմանային անցակետից:
ՀՀ էկոնոմիկայի նախարար Գևորգ Պապոյանը Դանիելյանի պնդումները կեղծ է անվանել: "Օգոստոսին Հայաստանից ՌԴ է մուտք գործել հայկական միրգ-բանջարեղենով բեռնված 762 բեռնատար, ընդամենը 4-ի մուտքն արգելվել է, որոնք վերադարձել են Վրաստանից։ Սիրելի Գառնիկ, ստելը լավ չէ", - գրել էր Պապոյանը։
