Արմինֆո.Եվրասիական տնտեսական միությունից (ԵԱՏՄ) Հայաստանի դուրս գալը և Ռուսաստանի հետ տնտեսական կապերի խզումը կհանգեցնի հայկական շուկայի կախվածության ադրբեջանական և թուրքական շուկաներից։ Այդ մասին իր տելեգրամ-ալիքում գրել է քաղաքագետ, քաղաքական մեկնաբան Բենիամին Մաթևոսյանը։
Անդրադառնալով դեպի Հայաստան բեռների տարանցման սահմանափակումները վերացնելու մասին Ադրբեջանի նախագահ Իլհամ Ալիևի եւ զինվորական ծառայության ժամկետը 24-ից մինչեւ 18 ամիս կրճատելու մասին ՀՀ վարչապետ Նիկոլ Փաշինյանի հայտարարություններին՝ Մաթևոսյանը համոզմունք է հայտնել, որ երկու ղեկավարների գործողությունների նման սինխրոնիզացումը միտված է 2026 թվականի ընտրություններից առաջ հայ ընտրազանգվածի մշակմանը։
Այդ առումով նա նաև ուշադրություն է հրավիրել Հայաստանի էկոնոմիկայի նախարար Գևորգ Պապոյանի հայտարարությանը, ով այսօր հաղորդել է, որ Ղազախստանից ցորենը շուտով Հայաստան կբերվի Ադրբեջանի և Վրաստանի երկաթուղիներով: "Սա նույնպես տեղավորվում է ռուսական ցորենի "փոխարինման" քաղաքականության մեջ", - նշել է քաղաքական մեկնաբանը:
Այսպիսով, ըստ Մաթևոսյանի, էական կդառնա նաև երկրի կախվածությունը Ադրբեջանի տարածքով տարանցումից, իսկ պայմանական ցորենի կամ գազի մատակարարումները կդառնան Հայաստանի նկատմամբ քաղաքական ներգործության լծակներ: Որպես օրինակ ՝ Մաթևոսյանը հիշեցրել է Լաչինի միջանցքի շրջափակման մասին։
Հիշեցնենք, որ ավելի վաղ Ադրբեջանի նախագահը հայտարարել էր դեպի Հայաստան բեռների տարանցման բոլոր սահմանափակումները վերացնելու մասին: Նա նշել էր, որ առաջին նման տարանցիկ բեռը ղազախական հացահատիկի բեռն էր դեպի Հայաստան և հայտարարել, որ դա ցուցանիշ է այն բանի, որ այժմ երկրների միջև խաղաղություն գոյություն ունի նաև գործնականում: Հայաստանում ողջունել են Ադրբեջանի նախագահի այս հայտարարությունը, նշելով, որ այն մեծ նշանակություն ունի տարածաշրջանային հաղորդակցությունների բացման համար:
Այսօր ՀՀ վարչապետ Նիկոլ Փաշինյանը հայտարարել է Հայաստանում պարտադիր զինվորական ծառայության ժամկետը 24 ամսից մինչեւ 18 ամիս կրճատելու մասին: Որոշումն ուժի մեջ կմտնի 2026 թվականի հունվարի 1-ից ։
