Արմինֆո. Հայաստանի Բարձր տեխնոլոգիական արդյունաբերության նախարարությանը բյուջետային հատկացումները 2026 թվականին կկազմեն 31,2 մլրդ դրամ։ Այդ մասին հոկտեմբերի 28-ին հայտարարել է գերատեսչության ղեկավար Մխիթար Հայրապետյանը՝ Ազգային ժողովի հանձնաժողովներում ՀՀ պետական բյուջեի նախագծի լսումների ժամանակ ։
Նրա խոսքով՝ նշված գումարը վերաբերում է միայն ծրագրերի այն մասին, որոնք փակ բնույթ չեն կրում։ Ընդհանուր առմամբ, նման նախագծերը 4-ն են, որոնց շրջանակներում հաջորդ տարի պետք է իրականացվի 16 ծրագիր։ Մասնավորապես, բարձր տեխնոլոգիական էկոհամակարգի ծրագրին և շուկայի զարգացմանը նախատեսվում է ուղղել 21,1 մլրդ դրամ։ Այդ նախագծի հիմնական նպատակը ոլորտի ենթակառուցվածքների բարելավումն է ՝ մասնագետների պատրաստման միջոցով։ Հաջորդ տարվանից նախատեսվում է սկսել ՏՏ ձեռնարկություններին աջակցություն ցուցաբերելու պիլոտային ծրագրի իրականացումը (ընդամենը 15 ենթածրագիր), որին կուղղվի 160 մլն դրամ ։ Բացի այդ, կշարունակվի զանգվածային ուսուցմանն աջակցության ծրագրի իրականացումը, իսկ բյուջետային հատկացումները կկազմեն 100 մլն դրամ։ Նախատեսվում է նաև անցկացնել 2 հաքաթոն, որոնց շրջանակներում տարբեր թիմեր կմրցեն տարբեր գաղափարներով և պրոդուկտներով, ինչին կուղղվի 60 մլն դրամ: Նախատեսվում է 2026 թվականին անցկացնել տարբեր դասընթացներ, որոնք 2009 թվականից անցկացվում են Հայաստանի և Հնդկաստանի կառավարությունների միջև ստորագրված հուշագրի համաձայն: Այդ ծրագրի շրջանակներում 2026 թվականին կպատրաստվի 520 մասնագետ, ինչին կուղղվի 213 մլն դրամ։
Նշենք, որ, պետբյուջեի նախագծի համաձայն, ՀՀ բարձր տեխնոլոգիական արդյունաբերության նախարարությանը հաջորդ տարի նախատեսվում է հատկացնել 37 մլրդ 352 մլն դրամ: Դա 10 մլրդ 157 մլն դրամով պակաս է 2025 թվականին սահմանված պետական բյուջեի ցուցանիշներից։
