Արմինֆո. 2026 թվականին Հայաստանի ջրային տնտեսության ոլորտի զարգացման համար կներգրավվի 35,3 մլրդ դրամ։ Այդ մասին հոկտեմբերի 31-ին հայտարարել է ՀՀ տարածքային կառավարման եւ ենթակառուցվածքների նախարար Դավիթ Խուդաթյանը՝ Ազգային ժողովի հանձնաժողովների նիստում 2026 թվականի պետական բյուջեի նախագծի քննարկման ժամանակ։
Նրա խոսքով՝ բյուջեի միջոցներն ուղղվելու են 5 ծրագրերի և 34 միջոցառումների իրականացմանը: Նշված միջոցներից 23,1 մլրդ դրամ նախատեսվում է օգտագործել ջրային տնտեսության համակարգի առողջացման խնդրի լուծման համար, որի 57,7 տոկոսը նախատեսվում է ուղղել կապիտալ շինարարությանը:
Նախարարը նշել է, որ հաջորդ տարի շարունակվելու է Կապսի ջրամբարի կառուցման նախագծի իրականացումը, և այդ ծրագրի համար կներգրավվի 7,7 մլրդ դրամ: Ծրագրի շրջանակներում նախատեսվում է նաև վերաբնակեցնել Ջրաձոր գյուղի բնակիչներին, որը ջրածածկ կլինի:
Բացի այդ, ինչպես շարունակել է նախարարը, 3,7 մլրդ դրամ նախատեսվում է ուղղել ջրային տնտեսության համակարգի կարողությունների բարելավմանը, եւս 7 մլրդ դրամ սուբսիդավորման տեսքով կստանան ջրօգտագործողների միությունները, եւ 1,3 մլրդ դրամ կուղղվի "ջրառ" ընկերության ծրագրերի համաֆինանսավորմանը:
Նախատեսվում է նաև 1 մլրդ դրամ ուղղել 12 փոքր ջրամբարների կառուցման տեխնիկատնտեսական հիմնավորման ուսումնասիրության և մշակման, ինչպես նաև Քասախի, Ելփինի, Լիճքի, Արթիկի և Աստղաձորի ջրամբարների կառուցման մեկնարկին: Գործող ջրամբարների արդիականացմանը կուղղվի 264,3 մլն դրամ։
