"Տաշիր Կապիտալ"-ը կրկին էլեկտրաէներգիայի սակագնի նվազեցման հայտ է ներկայացել: Հիմա գնդակը ՀԾԿՀ-ի դաշտում է

Արմինֆո. "Հայաստանի էլեկտրական ցանցեր" ՓԲԸ սեփականատեր "Տաշիր Կապիտալ"-ի կողմից էլեկտրաէներգիայի սակագնի նվազեցման հայտը մուտքագրվել է ՀՀ Հանրային ծառայությունները կարգավորող հանձնաժողով (ՀԾԿՀ): Այդ մասին սոցցանցում հաղորդել է "Մեր ձեւով" շարժման մամուլի քարտուղար Մարիաննա Ղահրամանյանը։ Ավելի վաղ "Տաշիր Կապիտալ"-ի գլխավոր տնօրեն Նարեկ Կարապետյանը սոցցանցում հաղորդել էր, որ բնակչության համար սակագինը 3 դրամով նվազեցնելու հնարավորություն կա:

Մամուլի քարտուղարը հիշեցրել է, որ ՀԷՑ-ի սեփականատերերը համանման հայտով ՀԾԿՀ-ին դիմել էին դեռեւս հունիսին (մինչեւ ազգայնացման գործընթացի մեկնարկը-խմբ.): «Հիմա, ինչպես ասում են, գնդակը հանձնաժողովի դաշտում է: Դրա համար համապատասխան ռեսուրս կա․ էլեկտրաէներգիայի սակագինը կարող է իջեցվել բնակչության համար։ Հարցը չափազանց կարեւոր է՝ նաեւ հաշվի առնելով, որ մոտ է ջեռուցման սեզոնը", - ասել է Ղահրամանյանը։

"Մեր ձեւով" շարժման ներկայացուցիչը կոչ է արեց բոլորին միանալ #Իջեցրուսակագինը հեշթեգով ֆլեշմոբին եւ տեղեկացնել հանրությանը նման հնարավորության մասին, "եւ ՀԾԿՀ-ից պահանջել գնալ սպառողի շահերից բխող քայլի":

"Տաշիր կապիտալ"-ի փաստաբան Վարդան Ալոյանն, իր հերթին, լրագրողներին հաղորդել է, որ նախորդ անգամ ՀԾԿՀ-ը մերժել է դիմումը, պատճառաբանելով, որ հիմք է ընդունվում 6 ամսվա կտրվածքով կատարված հաշվարկը, և կա ռիսկ, որ այն կարող է հակառակ ազդեցություն ունենալ՝ տարեկան կտրվածքով խնայողությունը կարող է բացասական լինել, ինչը, ընդհակառակը, կհանգեցնի սակագնի բարձրացման անհրաժեշտության։

"Հիմա մենք կրկին դիմում ենք ներկայացրել, տրամադրելով արդեն գրեթե մեկ տարվա հաշվարկ, հիմք ընդունելով այն, որ գումարն արդեն կազմում է ավելի քան 6 մլրդ դրամ։ Կրկին խնդրել ենք վերանայել սակագինը եւ իջեցնել այն", - հայտարարել է Ալոյանը։

Նրա խոսքով՝ կարեւորն այն է, որ դիմումը ներկայացվել է միանգամից մի քանի կողմերի անունից, որպեսզի հանձնաժողովը չկարողանա մերժել քննարկումը վկայակոչելով տեխնիկական պատճառներ՝ "Հայաստանի էլեկտրական ցանցերի" գլխավոր տնօրեն Կարեն Հարությունյանի անունից, "Տաշիր Կապիտալ" ընկերության բաժնետիրոջ անունից եւ ընկերության տնօրենների խորհրդի անունից:

Հիշեցնենք, որ հոկտեմբերի 29-ին "Հայաստանի էլեկտրական ցանցեր" ընկերության նախկին ղեկավար Դավիթ Ղազինյանը հաղորդել էր, որ սակագնի նվազեցման հայտը ՀԾԿՀ է ուղարկվել դեռևս հունիսի 6-ին, հաշվի առնելով, որ էներգահամակարգում գոյացել է 3,6 մլրդ դրամի դրական հաշվեկշիռ, պայմանավորված այն հանգամանքով, որ համակարգ ավելի մեծ ծավալով համեմատաբար էժան էլեկտրաէներգիա էր մուտք գործել, քան ենթադրվում էր: Սակայն Հայաստանի իշխանությունները քաղաքական նկատառումներով հետաձգում են էլեկտրաէներգիայի սակագնի իջեցումը, հավելել էր Ղազինյանը։ Նրա խոսքով՝ երկրի ղեկավարությունը ցանկանում է, նախ, ընկերությանը զրկել լիցենզիայից, ապա միայն նվազեցնել սակագինը։

Այսօր ավելի վաղ "Մեր ձեւով" շարժման համակարգող, "Տաշիր Կապիտալ" ՓԲԸ գլխավոր տնօրեն Նարեկ Կարապետյանը սոցցանցում հաղորդել էր, թե ինչպես կարելի է բնակչության համար սակագինը նվազեցնել 3 դրամով: «2024թ-ին ունեցել ենք էլ էներգիայի մուտք մոտ 5մլրդ կվտ, որից` բնակչության գծով մուտքը` 2.130 մլրդ կվտ: Չնայած Քպ-ական կառավարիչ նշանակելուց հետո կորուստների շեշտակի աճ կա, հին իներցիայի շնորհիվ այս պահին կա 6 մլրդ դրամի ավելացած գումար Հէցում: Իջեցնում ենք միայն բնակչության համար սահմանված սակագինը, և էլ.էներգիայի սակագինը իջնում է շուրջ 3 դրամով 1 կվտ ի համար», - նշել է նա։